ថ្ងៃទី១៩ មីនា (ពេលល្ងាចទី១)

Posted on 18 ខែមីនា 202513 ខែមករា 2026 by Siya Khim

រដូវសែសិបថ្ងៃ

សន្តយ៉ូសែប ជាស្វាមីព្រះនាងព្រហ្មចារិនីម៉ារី

(បុណ្យឱឡារិក)

^{(ពេលល្ងាចទី១)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១១៣

បន្ទរទី១៖ លោកយ៉ាកុបបង្កើតលោកយ៉ូសែប ជាស្វាមីរបស់នាងម៉ារី ដែលបង្កើតព្រះយេស៊ូ ហៅថាព្រះគ្រីស្ត ។

^១	ចូរសរសើរតម្កើងព្រះអម្ចាស់! អ្នកបម្រើរបស់ព្រះ‌អម្ចាស់អើយ ចូរនាំគ្នាសរសើរតម្កើងព្រះអង្គ! ចូរនាំគ្នាសរសើរតម្កើងព្រះ‌នាមព្រះអម្ចាស់!
^២	ចូរលើកតម្កើងព្រះ‌នាមព្រះ‌អម្ចាស់តាំងពីពេលនេះរហូតតទៅ!
^៣	តាំងពីពេលថ្ងៃរះ រហូតទល់ថ្ងៃលិច ចូរសរសើរតម្កើងព្រះ‌នាមរបស់ព្រះ‌អម្ចាស់!
^៤	ព្រះ‌អម្ចាស់គង់នៅពីលើប្រជាជាតិទាំងឡាយ សិរី‌រុងរឿងរបស់ព្រះ‌អង្គខ្ពស់ជាងផ្ទៃមេឃទៅទៀត។
^៥	តើមាននរណាអាចផ្ទឹមស្មើនឹងព្រះអម្ចាស់ជាព្រះរបស់យើងបាន? ព្រះ‌អង្គគង់នៅលើស្ថានដ៏ខ្ពស់បំផុត
^៦	ព្រះ‌អង្គទតមើលមកផ្ទៃមេឃនិងផែន‌ដី ដែលនៅខាងក្រោមព្រះ‌អង្គ។
^៧	ព្រះ‌អង្គលើកមនុស្សទន់ខ្សោយឡើងពីធូលីដី ព្រះ‌អង្គលើកមនុស្សទុរគតឡើងពីភក់ជ្រាំ
^៨	ដើម្បីឲ្យគេកាន់កាប់អំណាចរួមជាមួយពួកអ្នកធំ គឺរួមជាមួយពួកអ្នកធំនៅក្នុងចំណោមប្រជារាស្ដ្ររបស់ព្រះអង្គ។
^៩	ព្រះអង្គប្រទានឲ្យស្ត្រីអារមានកូន ឲ្យនាងរស់នៅក្នុងផ្ទះយ៉ាងសប្បាយជាមួយកូនៗរបស់នាង។ អាលេលូយ៉ា!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ លោកយ៉ាកុបបង្កើតលោកយ៉ូសែប ជាស្វាមីរបស់នាងម៉ារី ដែលបង្កើតព្រះយេស៊ូ ហៅថាព្រះគ្រីស្ត ។

ទំនុកតម្កើងលេខ ១៤៦

បន្ទរទី២៖ ព្រះជាម្ចាស់បានចាត់ទេវទូតកាព្រីអែលឲ្យទៅភូមិណាសារ៉ែត ក្នុងស្រុកកាលី‌ឡេ ដើម្បីជួបនឹងស្ត្រីក្រមុំព្រហ្មចារីម្នាក់ ជាគូដណ្ដឹងរបស់កំលោះម្នាក់ ឈ្មោះយ៉ូសែប ។

(បទពាក្យ ៧)

^១-	ឱព្រះអម្ចាស់អើយខ្ញុំសូម	តម្កើងទាំងព្រមដោយចិត្តស្មោះ
	ឥតមានលាក់លៀមទុកកៀនកោះ	បញ្ចេញដោយស្មោះអស់ពីចិត្ត	។
^២-	ខ្ញុំសូមសរសើរលើកតម្កើង	ព្រះម្ចាស់ខ្ពស់ឡើងមួយជីវិត
	ខ្ញុំស្មូតចម្រៀងមានបែបបទ	ឲ្យបានចាំស្ទាត់ពេលនៅរស់	។
^៣-	កុំទុកចិត្តពួកមនុស្សលោក	មានច្រើនគរគោកចិត្តមិនស្មោះ
	កុំទុកចិត្តមេដឹកនាំនោះ	ពុំអាចសង្គ្រោះបានឡើយណា	។
^៤-	ពេលដែលដង្ហើមគេត្រូវផុត	ជីវិតរលត់អស់សង្ខារ
	ក្លាយជាធូលីដីអសារ	ទាំងគម្រោងការរលាយព្រម	។
^៥-	អ្នកដែលព្រះលោកយ៉ាកុបជួយ	សង្គ្រោះផុតព្រួយហើយសង្ឃឹម
	ទុកចិត្តលើព្រះគ្មានអ្វីផ្ទឹម	រស់ដោយញញឹមគ្មានភិតភ័យ	។
^៦-	ព្រះអង្គបង្កើតទាំងផ្ទៃមេឃ	ផែនដីល្អឯកធំពេកក្រៃ
	សមុទ្រព្រមទាំងអស់អ្វីៗ	សន្យាថ្លាថ្លៃទ្រង់មិនភ្លេច	។
^៧-	ព្រះអង្គរកយុត្តិធម៌ឲ្យ	ដល់អ្នកទន់ខ្សោយមិនកែគេច
	ចែកអាហារដល់អ្នកឃ្លានស្រេច	ហើយទ្រង់សម្រេចលែងអ្នកទោស	។
^៨-	ព្រះអម្ចាស់ប្រោសមនុស្សខ្វាក់	ហើយលើកអស់អ្នកដែលនៅរស់
	អស់ក្តីសង្ឃឹមគ្មានអ្វីសោះ	ស្រឡាញ់អ្នកស្មោះត្រង់ល្អជា	។
^៩-	ព្រះម្ចាស់គាំទ្រជនបរទេស	មេម៉ាយនិងអស់ក្មេងកំព្រា
	តែទ្រង់ធ្វើឲ្យគម្រោងការ	ជនខូចពាលាវិនាសបង់	។
^១០-	ព្រះអម្ចាស់ទ្រង់នឹងគ្រងរាជ្យ	អស់កល្បជានិច្ចតយូរលង់
	ឱក្រុងស៊ីយ៉ូនដ៏រឿងរុង	ព្រះអ្នកនឹងគ្រងរាជ្យតទៅ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ៖ ព្រះជាម្ចាស់បានចាត់ទេវទូតកាព្រីអែលឲ្យទៅភូមិណាសារ៉ែត ក្នុងស្រុកកាលី‌ឡេ ដើម្បីជួបនឹងស្ត្រីក្រមុំព្រហ្មចារីម្នាក់ ជាគូដណ្ដឹងរបស់កំលោះម្នាក់ ឈ្មោះយ៉ូសែប ។

បទលើកតម្កើងតាមលិខិតអេភេសូ (១,៣-១០)

បន្ទរទី៣៖ នាងម៉ារី មាតារបស់ព្រះយេស៊ូ ត្រូវជាគូដណ្តឹងរបស់លោកយ៉ូសែប។ មុនពេលអ្នកទាំងពីររួមរស់ជាមួយគ្នា នាងម៉ារីមានផ្ទៃពោះដោយសារព្រះវិញ្ញាណដ៏វិសុទ្ធរួចទៅហើយ ។

^៣	សូមលើកតម្កើងព្រះ‌ជាម្ចាស់ ជាព្រះ‌បិតារបស់ព្រះ‌យេស៊ូ‌គ្រីស្ត ជាព្រះ‌អម្ចាស់នៃយើង ដែលបានប្រោសប្រទានព្រះ‌ពរគ្រប់យ៉ាង ផ្នែកខាងវិញ្ញាណពីស្ថានបរម‌សុខមកយើង ក្នុងអង្គព្រះ‌គ្រីស្ត។
^៤	ព្រះ‌អង្គបានជ្រើស‌រើសយើងក្នុងអង្គព្រះ‌គ្រីស្ត តាំងពីមុនកំណើតពិភព‌លោកមកម៉្លេះ ដើម្បីឲ្យយើងវិសុទ្ធ និងឥតសៅ‌ហ្មងនៅចំពោះព្រះ‌ភក្ត្រព្រះ‌អង្គ ព្រោះព្រះ‌អង្គមានព្រះ‌ហឫទ័យស្រឡាញ់យើង។
^៥	ព្រះ‌អង្គបានតម្រូវយើងទុកជាមុន ឲ្យធ្វើជាបុត្រធីតារបស់ព្រះ‌អង្គ ដោយ‌សារព្រះ‌យេស៊ូ‌គ្រីស្ត ស្របនឹងបំណងដ៏សប្បុរសរបស់ព្រះ‌អង្គ
^៦	ដើម្បីឲ្យយើងលើកតម្កើងសិរី‌រុងរឿងនៃព្រះ‌ហឫទ័យប្រណី‌សន្ដោស ដែលព្រះ‌អង្គបានប្រោសប្រទានមកយើង ក្នុងអង្គព្រះ‌បុត្រាដ៏ជាទីស្រឡាញ់របស់ព្រះ‌អង្គ។
^៧	ដោយយើងរួមក្នុងអង្គព្រះ‌គ្រីស្តនេះ ព្រះ‌ជាម្ចាស់បានលោះយើង ដោយព្រះ‌លោហិតរបស់ព្រះ‌អង្គ និងលើក‌លែងទោសឲ្យយើងបានរួចពីបាប តាមព្រះ‌ហឫទ័យប្រណី‌សន្ដោសដ៏លើសលប់របស់ព្រះអង្គ។
^៨	ព្រះ‌ជាម្ចាស់ប្រណី‌សន្ដោសយើងយ៉ាងខ្លាំងបំផុត គឺព្រះ‌អង្គប្រទានឲ្យយើងមានតម្រិះ និងប្រាជ្ញាដ៏វាង‌វៃគ្រប់យ៉ាង។
^៩	ព្រះអង្គបានប្រោសឲ្យយើងស្គាល់គម្រោងការដ៏លាក់កំបាំង នៃព្រះ‌ហឫទ័យរបស់ព្រះ‌អង្គ តាមបំណងដ៏សប្បុរស ដែលព្រះ‌អង្គបានសម្រេចទុកជាមុនដោយព្រះ‌អង្គផ្ទាល់។
^១០	ព្រះអង្គចាត់ចែងគម្រោងការនេះឲ្យបានសម្រេច នៅគ្រាចុងក្រោយបំផុត គឺប្រមូលអ្វីៗទាំងអស់ដែលនៅស្ថានបរមសុខ និងនៅលើផែនដី ឲ្យរួមគ្នានៅក្នុងអង្គព្រះ‌គ្រីស្ត ជាម្ចាស់តែមួយ។

បន្ទរ៖ នាងម៉ារី មាតារបស់ព្រះយេស៊ូ ត្រូវជាគូដណ្តឹងរបស់លោកយ៉ូសែប។ មុនពេលអ្នកទាំងពីររួមរស់ជាមួយគ្នា នាងម៉ារីមានផ្ទៃពោះដោយសារព្រះវិញ្ញាណដ៏វិសុទ្ធរួចទៅហើយ ។

ព្រះបន្ទូលរបស់ព្រះជាម្ចាស់ (កូឡ ៣,២៣-២៤)

គ្រប់កិច្ច‌ការដែលបង‌ប្អូនធ្វើ ចូរធ្វើឲ្យអស់ពីចិត្ត ដូចជាធ្វើថ្វាយព្រះ‌អម្ចាស់ដែរ គឺមិនមែនធ្វើសម្រាប់មនុស្សលោកទេ ដោយដឹងថា បង‌ប្អូនមុខជាទទួលមត៌កពីព្រះ‌អម្ចាស់ទុកជាកម្រៃមិនខាន។ ម្ចាស់ដ៏ពិតប្រាកដ គឺព្រះ‌គ្រីស្ត ចូរបម្រើព្រះ‌អង្គទៅ។

បន្ទរ៖ មនុស្សសុចរិត*នឹងរីកស្គុស‌ស្គាយដូចផ្កាចន្ធូ។ បន្ទរឡើងវិញ៖…
—ហើយលូតលាស់នៅក្នុងព្រះ‌វិហាររបស់ព្រះ‌ជាម្ចាស់។ បន្ទរ៖ *…
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ អ្នកបម្រើណាមានចិត្តស្មោះ‌ត្រង់ ហើយប៉ិន‌ប្រសប់ ម្ចាស់មុខជាផ្ទុក‌ផ្ដាក់ឲ្យគាត់មើលខុសត្រូវលើអ្នកបម្រើឯទៀតៗ (អាលេលូយ៉ា!)។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ អ្នកបម្រើណាមានចិត្តស្មោះ‌ត្រង់ ហើយប៉ិន‌ប្រសប់ ម្ចាស់មុខជាផ្ទុក‌ផ្ដាក់ឲ្យគាត់មើលខុសត្រូវលើអ្នកបម្រើឯទៀតៗ (អាលេលូយ៉ា!)។

ពាក្យអង្វរសកល

រាល់បិតុភាពទាំងនៅស្ថានបរមសុខ និងនៅលើផែនដី មានប្រភពចេញមកពីព្រះជាម្ចាស់។ ចូរយើងវិលត្រឡប់ទៅរកព្រះអង្គវិញ ហើយទូលថា ៖

បន្ទរ៖ ឱព្រះបិតាយើងខ្ញុំដែលគង់នៅស្ថានបរមសុខអើយ ! សូមព្រះអង្គសណ្តាប់ពាក្យអធិដ្ឋានរបស់យើងខ្ញុំផង !

បពិត្រព្រះបិតាដ៏វិសុទ្ធគ្រប់យ៉ាង ! ព្រះអង្គបានសម្តែងឱ្យសន្តយ៉ូសែបដឹងពីគម្រោងការនៃការសង្រ្គោះអស់កល្បជានិច្ច ក្នុងអង្គព្រះគ្រីស្ត
—សូមព្រះអង្គប្រោសឱ្យយើងខ្ញុំយល់កាន់តែស៊ីជម្រៅអំពីព្រះបុត្រាព្រះអង្គ ដែលជាព្រះជាម្ចាស់ដ៏ពិតប្រាកដ និងជាមនុស្សដ៏ពិតប្រាកដ។ (បន្ទរ)

បពិត្រព្រះបិតាដែលគង់នៅស្ថានបរមសុខ ! ព្រះអង្គបានចិញ្ចឹមបក្សាបក្សីនៅលើអាកាស ហើយឱ្យទីវាលបង្កើតភោគផលផ្លែផ្កានៅលើផែនដី
—សូមព្រះអង្គប្រទានអាហារប្រចាំថ្ងៃឱ្យបុត្រធីតាព្រះអង្គ ទាំងខាងព្រលឹង និងរូបកាយ។ (បន្ទរ)

ឱព្រះដែលបង្កើតសកលលោកអើយ ! ព្រះអង្គបានប្រគល់ស្នាព្រះហស្តរបស់ព្រះអង្គឱ្យយើងខ្ញុំមើលថែរក្សា
—សូមឱ្យអស់អ្នកដែលធ្វើការ ទទួលបានរង្វាន់ដែលមកពីកម្លាំងញើសឈាមខ្លួនឯងផង។ (បន្ទរ)

ឱព្រះជាម្ចាស់នៃសេចក្តីសុចរិតគ្រប់យ៉ាង ! ព្រះអង្គសព្វព្រះហឫទ័យឱ្យយើងខ្ញុំទាំងអស់គ្នាធ្វើដូចព្រះអង្គ
—សូមសន្តយ៉ូសែបជួយជំរុញយើងខ្ញុំឱ្យដើរតាមមាគ៌ានៃភាពដ៏វិសុទ្ធរបស់ព្រះអង្គជានិច្ចផង។ (បន្ទរ)

សូមព្រះអង្គទតមើលមកអស់អ្នកដែលជិតផុតដង្ហើម និងមរណបុគ្គល ដោយព្រះហឫទ័យសប្បុរស និងប្រទានឱ្យពួកគេនូវធម៌មេត្តាករុណារបស់ព្រះអង្គ
—តាមរយៈពាក្យទូលអង្វររបស់ព្រះយេស៊ូ ព្រះនាងម៉ារី និងសន្តយ៉ូសែបផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាដ៏មានឫទ្ធានុភាពសព្វប្រការ ! ព្រះអង្គបានប្រោសឲ្យសន្តយ៉ូសែបទទួលបន្ទុកថែទាំព្រះយេស៊ូជាព្រះសង្គ្រោះ។ តាមរយៈពាក្យទូលអង្វររបស់សន្តយ៉ូសែប សូមមេត្តាប្រោសឲ្យព្រះសហគមន៍បានទទួលការសង្រ្គោះពីព្រះអង្គ ហើយបង្ហាញដល់មនុស្សលោកសព្វថ្ងៃនេះ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

116 Views

Post Views: 116