រដូវសែសិបថ្ងៃ

សន្តយ៉ូហានបាទីស្ត ដឺឡាសាល ជាបូជាចារ្យ

(រំឭកចាំបាច់)

ថ្ងៃចន្ទ អាទិត្យទី៥
_{(ពេលព្រឹក)}

ការអញ្ជើញមុនអធិដ្ឋាននៅពេលព្រឹក

• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ ថ្ងៃ​នេះ បើ​អ្នក​រាល់​គ្នា​ឮ​ព្រះ‌សូរសៀង​របស់​ព្រះ‌អង្គ មិន​ត្រូវ​មាន​ចិត្ត​រឹង‌រូសឡើយ។

ទំនុកតម្កើងតាមការជ្រើសរើស

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៥,២-១០.១២-១៣

ពាក្យ​អធិស្ឋាន​សូម​ព្រះជាម្ចាស់ការពារ

អស់​អ្នក​ដែល​បាន​ទទួល​ព្រះ​បន្ទូល​របស់​ព្រះជាម្ចាស់​នៅ​ក្នុងជីវិត នឹង​មាន​អំណរជា​រៀង​រហូត។

បន្ទរទី១៖ ឱព្រះអម្ចាស់អើយ ! នៅពេលព្រឹក ព្រះអង្គព្រះសណ្តាប់សំឡេង​របស់ទូលបង្គំ ទូល‌បង្គំផ្ចង់​ចិត្តគំនិត​ទៅ​រក​ព្រះ‌អង្គ។

២	ឱព្រះអម្ចាស់អើយ! សូមព្រះអង្គផ្ទៀងព្រះកាណ៌ស្តាប់ពាក្យរបស់ទូលបង្គំ! សូមទ្រង់ព្រះសណ្តាប់សម្រែកដ៏ឈឺចាប់របស់ទូលបង្គំផង។
៣	ឱព្រះអម្ចាស់ ជាព្រះមហាក្សត្រនៃទូលបង្គំអើយ! សូមយកព្រះហឫទ័យទុកដាក់នឹងសូរសម្រែករបស់ទូលបង្គំផង ដ្បិតទូលបង្គំសូមអង្វរព្រះអង្គហើយ។
៤	ឱព្រះអម្ចាស់អើយ! នៅពេលព្រឹក ព្រះអង្គសណ្តាប់សំឡេងរបស់ទូលបង្គំ ទូលបង្គំចូលមកគាល់ ហើយនៅរង់ចាំព្រះអង្គតាំងពីព្រលឹម។
៥	ព្រះអង្គមិនសព្វព្រះហឫទ័យនឹងអំពើទុច្ចរិតទេ មនុស្សអាក្រក់ពុំអាចនៅក្បែរព្រះអង្គបានឡើយ
៦	ព្រះអង្គមិនចង់ឃើញមនុស្សព្រហើនចូលមកជិតព្រះអង្គទេ ព្រះអង្គក៏មិនសព្វព្រះហឫទ័យនឹងមនុស្សដែលប្រព្រឹត្តអំពើទុច្ចរិតដែរ។
៧	ព្រះអង្គនឹងធ្វើឱ្យពួកកុហកវិនាសសាបសូន្យ។ ព្រះអម្ចាស់ស្អប់ខ្ពើមអ្នកបង្ហូរឈាម និងអ្នកមានល្បិចកល។
៨	រីឯទូលបង្គំវិញ ទូលបង្គំចូលមកក្នុងព្រះដំណាក់របស់ព្រះអង្គបាន ដោយសារតែព្រះអង្គមានព្រះហឫទ័យសប្បុរសយ៉ាងខ្លាំងចំពោះទូលបង្គំ។ ទូលបង្គំសូមក្រាបថ្វាយបង្គំព្រះអង្គ ដោយបែរមុខតម្រង់ទៅព្រះវិហារដ៏វិសុទ្ធរបស់ព្រះអង្គ ទាំងគោរពកោតខ្លាច។
៩	ឱព្រះអម្ចាស់អើយ! មានមនុស្សជាច្រើនចាំឃ្លាំមើលទូលបង្គំ សូមដឹកនាំទូលបង្គំឱ្យធ្វើតាមព្រះហឫទ័យរបស់ព្រះអង្គ សូមពង្រាបផ្លូវរបស់ព្រះអង្គនៅមុខទូលបង្គំផង។
១០	អ្នកទាំងនោះមានពាក្យសំដីមិនទៀងទេ គេគិតតែចង់បំផ្លិចបំផ្លាញ។ អណ្តាតរបស់គេគ្រលាស់ចេញនូវពាក្យបញ្ចើចបញ្ចើ និងបង្កប់ទៅដោយពិសពុល ដើម្បីប្រហារជីវិត។
១១	រីឯអស់អ្នកជ្រកកោនក្រោមម្លប់បារមីព្រះអង្គ នឹងមានអំណរ គេនឹងសប្បាយរីករាយរហូតតទៅ ហើយព្រះអង្គក៏នឹងរក្សាការពារគេដែរ។ អស់អ្នកដែលស្រឡាញ់ព្រះនាមរបស់ព្រះអង្គ នឹងសប្បាយរីករាយយ៉ាងខ្លាំង
១៣	បពិត្រព្រះអម្ចាស់! ព្រះអង្គតែងតែប្រទានពរឱ្យមនុស្សសុចរិត ព្រះហឫទ័យមេត្តាករុណារបស់ព្រះអង្គ ប្រៀបបានទៅនឹងខែលការពារគេ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ ឱព្រះអម្ចាស់អើយ ! នៅពេលព្រឹក ព្រះអង្គព្រះសណ្តាប់សំឡេង​របស់ទូលបង្គំ ទូល‌បង្គំផ្ចង់​ចិត្តគំនិត​ទៅ​រក​ព្រះ‌អង្គ។

បទលើកតម្កើងតាមគម្ពីររបាក្សត្រទី១ (១របា ២៩,១០-១៣)

ដ្បិត​ព្រះជាម្ចាស់តែមួយព្រះអង្គគត់ ដែល​មាន​កិត្តិយស និង​សិរីរុងរឿង

សូមលើកតម្កើងព្រះជាម្ចាស់ ជាព្រះបិតារបស់ព្រះយេស៊ូគ្រីស្តជាព្រះអម្ចាស់នៃយើង (អេភេសូ ១,៣)។

បន្ទរទី២ ៖ ឱ​ព្រះអម្ចាស់ ជា​ព្រះ​នៃ​យើងខ្ញុំ ! យើងខ្ញុំសូម​សរសើរតម្កើងសិរី‌រុងរឿង​នៃ​ព្រះ‌នាម​ព្រះអង្គ។

(បទកាកគតិ)

បន្ទរ ៖ ឱព្រះ‌អម្ចាស់ ជាព្រះនៃយើងខ្ញុំអើយ! យើងខ្ញុំសូមសរសើរតម្កើងសិរី‌រុងរឿងនៃព្រះ‌នាមព្រះអង្គ។

ទំនុកតម្កើងលេខ ២៩

ចូរលើកតម្កើងព្រះបន្ទូលរបស់ព្រះជាម្ចាស់ជាសាធារណៈ

ពេលនោះ មានព្រះសូរសៀងពីលើមេឃមកថាៈ “នេះជាបុត្រដ៏ជាទី​ស្រឡាញ់​របស់យើង យើងគាប់ចិត្តនឹងព្រះអង្គណាស់!” (មថ ៣,១៧)។

បន្ទរទី៣ ៖ ចូរគោរពថ្វាយបង្គំព្រះអម្ចាស់ នៅក្នុងទីសក្ការៈដ៏វិសុទ្ធរបស់ព្រះអង្គ។

១	ពួកទេវទូតអើយ! ចូរនាំគ្នាតម្កើងព្រះអម្ចាស់! ចូរលើកតម្កើងសិរីរុងរឿង និងតេជានុភាពរបស់ព្រះអម្ចាស់។
២	ចូរលើកតម្កើងព្រះនាមដ៏រុងរឿងរបស់ព្រះអម្ចាស់ ចូរនាំគ្នាក្រាបថ្វាយបង្គំព្រះអម្ចាស់ នៅពេលព្រះអង្គសម្តែងភាពវិសុទ្ធរបស់ព្រះអង្គ!។
៣	ព្រះសូរសៀងរបស់ព្រះអម្ចាស់លាន់ឮឡើងនៅពីលើផ្ទៃទឹក ព្រះជាម្ចាស់ប្រកបដោយសិរីរុងរឿង ធ្វើឱ្យផ្គរលាន់ឮឡើង ព្រះអម្ចាស់គង់នៅពីលើមហាសាគរ។
៤	ព្រះសូរសៀងរបស់ព្រះអម្ចាស់លាន់ឮឡើងប្រកបដោយឫទ្ធានុភាព ព្រះសូរសៀងរបស់ព្រះអម្ចាស់លាន់ឮឡើងប្រកបដោយភាពថ្កុំថ្កើង
៥	ព្រះសូរសៀងរបស់ព្រះអម្ចាស់ធ្វើឱ្យបាក់ដើមឈើធំៗ ព្រះអម្ចាស់បំបាក់ដើមឈើធំៗនៅភ្នំលីបង់។
៦	ព្រះអង្គធ្វើឱ្យភ្នំលីបង់លោតដូចកូនគោ ព្រះអង្គធ្វើឱ្យភ្នំស៊ីរីយ៉ូនលោតដូចកូនក្របី។
៧	ព្រះសូរសៀងរបស់ព្រះអម្ចាស់ធ្វើឱ្យមានរន្ទះលេចចេញមក។
៨	ព្រះសូរសៀងរបស់ព្រះអម្ចាស់ធ្វើឱ្យវាលរហោស្ថានកក្រើក ព្រះអម្ចាស់ធ្វើឱ្យវាលរហោស្ថានកាដែសរញ្ជួយ។
៩	ព្រះសូរសៀងរបស់ព្រះអម្ចាស់អង្រួនក្តាន់ញីកំពុងកើតកូន និងធ្វើឱ្យព្រៃឈើជ្រុះស្លឹកអស់។ ពេលនោះមនុស្សទាំងអស់ស្រែកឡើងក្នុងព្រះវិហារថា “សូមលើកតម្កើងសិរីរុងរឿងព្រះអម្ចាស់!”។
១០	ព្រះអម្ចាស់គ្រប់គ្រងលើទឹកជំនន់ដ៏ធំ ព្រះអម្ចាស់ជាព្រះមហាក្សត្រគ្រប់គ្រងរហូតតរៀងទៅ
១១	ព្រះអម្ចាស់ប្រទានឫទ្ធានុភាពឱ្យប្រជារាស្ត្ររបស់ព្រះអង្គ ព្រះអម្ចាស់ប្រទានពរឱ្យប្រជារាស្ត្ររបស់ព្រះអង្គមានសន្តិភាព។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ចូរគោរពថ្វាយបង្គំព្រះអម្ចាស់ នៅក្នុងទីសក្ការៈដ៏វិសុទ្ធរបស់ព្រះអង្គ។

ព្រះបន្ទូលរបស់ព្រះជាម្ចាស់ (យរ ១២,១៩-២០)

ពី​មុន ខ្ញុំ​ប្រៀប​បាន​នឹង​កូន​ចៀម​ដ៏​ស្លូត ដែល​គេ​ដឹក​ទៅ​ទី​សត្ត‌ឃាត។ ខ្ញុំ​ពុំ​បាន​ដឹង​អំពី​គម្រោង‌ការ ដែល​ពួក​គេ​គិត​បម្រុង​នឹង​ធ្វើចំពោះ​ខ្ញុំ​ទេ។ ពួក​គេ​និយាយ​គ្នា​អំពី​ខ្ញុំ​ថា “យើង​នាំ​គ្នា​រំលំ​ដើម​ឈើ​កំពុង​តែ​មាន​ផ្លែ​នេះ​ទៅ យើងដក​វា​ចេញ​ពី​ចំណោម​មនុស្ស​មាន​ជីវិត កុំ​ឲ្យ​នរណា​នឹក​នា​ដល់​ឈ្មោះ​វា​ទៀត!” ។ បពិត្រ​ព្រះ‌អម្ចាស់​នៃ​ពិភព​ទាំង​មូល ព្រះ‌អង្គ​ជា​ចៅក្រម​ដ៏​សុចរិត ព្រះអង្គ​ឈ្វេង​យល់​ចិត្ត​ថ្លើម​របស់​មនុស្សយ៉ាង​ច្បាស់ ទូលបង្គំ​នឹង​ឃើញ​ព្រះអង្គ​រក​យុត្តិធម៌ ដោយ​ដាក់​ទោស​ពួក​គេ​ជា​មិន​ខាន ទូលបង្គំប្រគល់​រឿង​ហេតុ​របស់​ទូល‌បង្គំលើ​ព្រះ‌អង្គ​ទាំង​ស្រុង។

បន្ទរ ៖ ព្រះ‌អម្ចាស់នឹងរំដោះទូលបង្គំ*ឲ្យរួចផុតពីអន្ទាក់។ បន្ទរឡើងវិញ៖…
-ដែលគេដាក់ចាំចាប់ទូល‌បង្គំ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ ៖ «អ្នក​ណា​មក​តាម​ខ្ញុំ អ្នក​នោះ​នឹង​មិន​ដើរ​ក្នុង​សេចក្ដីងងឹត​ឡើយ គឺ​គេ​មាន​ពន្លឺ​នាំ​គេ​ទៅ​កាន់​ជីវិត» ។

៦៨	”សូមលើកតម្កើងព្រះអម្ចាស់ ជាព្រះរបស់ជនជាតិអ៊ីស្រាអែល ដ្បិតទ្រង់សព្វព្រះហឫទ័យយាងមករំដោះប្រជារាស្ត្ររបស់ព្រះអង្គ។
៦៩	ទ្រង់បានប្រទានព្រះសង្គ្រោះដ៏មានឫទ្ធិមួយព្រះអង្គ ពីក្នុងចំណោមព្រះញាតិវង្សរបស់ព្រះបាទដាវីឌ ជាអ្នកបម្រើព្រះអង្គឱ្យមកយើង។
៧០	ព្រះជាម្ចាស់ប្រទានព្រះសង្គ្រោះនេះមកយើង ស្របនឹងព្រះបន្ទូលសន្យា ថ្លែងតាមរយៈព្យាការីរបស់ព្រះអង្គនៅជំនាន់ដើម
៧១	គឺព្រះអង្គសង្គ្រោះយើងឱ្យរួចពីកណ្តាប់ដៃរបស់ខ្មាំងសត្រូវ និងរួចពីអំណាចរបស់អ្នកដែលស្អប់យើង
៧២	ព្រះអង្គសម្ដែងព្រះហឫទ័យមេត្តាករុណាដល់បុព្វបុរសយើង ហើយគោរពតាមសម្ពន្ធមេត្រីរបស់ព្រះអង្គយ៉ាងស្មោះស្ម័គ្រ
៧៣	គឺព្រះអង្គបានសន្យាយ៉ាងម៉ឺងម៉ាត់ដល់លោកអប្រាហាំ ជាបុព្វបុរសរបស់យើងថា
៧៤	ទ្រង់នឹងរំដោះយើងឱ្យរួចពីកណ្តាប់ដៃរបស់ខ្មាំងសត្រូវ ដើម្បីយើងអាចគោរពបម្រើព្រះអង្គបានដោយឥតភ័យខ្លាច
៧៥	ព្រមទាំងឱ្យយើងរស់នៅបានបរិសុទ្ធ និងសុចរិតជាទីគាប់ព្រះហឫទ័យព្រះជាម្ចាស់ ជារៀងរាល់ថ្ងៃ រហូតអស់មួយជីវិត។
៧៦	ចំណែកឯកូនវិញ កូននឹងទៅជាព្យាការីរបស់ព្រះដ៏ខ្ពង់ខ្ពស់បំផុត ព្រោះកូននឹងដើរមុខព្រះអម្ចាស់ ដើម្បីរៀបចំផ្លូវថ្វាយព្រះអង្គ។
៧៧	កូននឹងឱ្យប្រជារាស្ត្ររបស់ព្រះអង្គដឹងថា ព្រះអង្គសង្គ្រោះគេ ដោយលើកលែងគេឱ្យរួចពីបាប។
៧៨	ព្រះរបស់យើងមានព្រះទ័យមេត្តាករុណាដ៏លើសលប់ ព្រះអង្គប្រទានថ្ងៃរះពីស្ថានលើមក ដើម្បីរំដោះយើង
៧៩	និងដើម្បីបំភ្លឺអស់អ្នកដែលស្ថិតនៅក្នុងទីងងឹត ក្រោមអំណាចនៃសេចក្តីស្លាប់ ព្រមទាំងតម្រង់ផ្លូវយើងឆ្ពោះទៅរកសេចក្តីសុខសាន្ត។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

ឬ ទំនុកតម្កើងរបស់លោកសាការី (តាមបែបស្មូត) បទពាក្យ ៧

៦៨-	សូមលើកតម្កើងព្រះអម្ចាស់	ប្រសើរពេកណាស់ព្រះរបស់
	ជាតិអ៊ីស្រាអែលធ្លាប់ស្ម័គ្រស្មោះ	យាងមករំដោះរាស្ត្រព្រះអង្គ	។
៦៩-	ទ្រង់បានប្រទានព្រះសង្គ្រោះ	ដែលមានឫទ្ធិខ្ពស់ដ៏ត្រចង់
	ពីក្នុងចំណោមព្រះញាតិវង្ស	នៃអង្គដាវីឌបម្រើជាក់	។
៧០-	ព្រះម្ចាស់ប្រទានព្រះសង្គ្រោះ	យើងមិនដែលលោះមិនដែលអាក់
	ដូចបានសន្យាតាមរយៈ	ព្យាការីធ្លាប់ស្ម័គ្រកាលគ្រាមុន	។
៧១-	ព្រះអង្គសង្គ្រោះយើងឱ្យរួច	ចេញពីអំណាចខ្មាំងលើសលន់
	និងផុតពីដៃពួកទុរជន	ដែលធ្លាប់ជិះជាន់ស្អប់ខ្ពើមយើង	។
៧២-	ព្រះអង្គសម្ដែងព្រះហឫទ័យ	ករុណាប្រណីមិនឆ្មៃឆ្មើង
	ដល់បុព្វបុរសដែលតម្កើង	សម្ពន្ធព្រះអង្គមិនភ្លេចសោះ	។
៧៣-	គឺព្រះអង្គហើយបានសន្យា	ពាក្យពិតសត្យាមិនចន្លោះ
	នឹងអប្រាហាំបុព្វបុរស	ដូនតាយើងនោះដូច្នេះថា	។
៧៤-	ទ្រង់នឹងរំដោះយើងឱ្យរួច	ផុតពីអំណាចខ្មាំងឫស្យា
	ដើម្បីយើងអាចក្រាបវន្ទា	ព្រះអង្គគ្រប់គ្រាគ្មានភ័យភិត	។
៧៥-	ព្រមទាំងឱ្យយើងបានរស់នៅ	ឥតមានអាស្រូវដោយសុចរិត
	ជារៀងរាល់ថ្ងៃមួយជីវិត	គាប់ព្រះទ័យពិតព្រះម្ចាស់ថ្លៃ	។
៧៦-	ចំណែកឯរូបរបស់កូន	នឹងក្លាយខ្លួនជាព្យាការី
	ព្រោះកូនដើរមុខព្រះម្ចាស់ថ្លៃ	រៀបផ្លូវល្អក្រៃថ្វាយព្រះអង្គ	។
៧៧-	កូននឹងធ្វើឱ្យអស់ប្រជា	រាស្ត្រទាំងអស់គ្នាគេបានដឹង
	ថាព្រះសង្គ្រោះគឺព្រះអង្គ	ទាំងលើកទោសផងរួចពីបាប	។
៧៨-	ព្រះរបស់យើងមានព្រះទ័យ	ករុណាប្រណីជាដរាប
	ទ្រង់ប្រទានថ្ងៃរះរៀងរាប	រំដោះរួចបាបយើងពិតៗ	។
៧៩-	សម្រាប់បំភ្លឺដល់អស់អ្នក	ដែលបាននៅស្នាក់ទីងងឹត
	ព្រមទាំងតម្រង់ផ្លូវជីវិត	យើងឆ្ពោះទៅរកក្តីសុខសាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ «អ្នក​ណា​មក​តាម​ខ្ញុំ អ្នក​នោះ​នឹង​មិន​ដើរ​ក្នុង​សេចក្ដីងងឹត​ឡើយ គឺ​គេ​មាន​ពន្លឺ​នាំ​គេ​ទៅ​កាន់​ជីវិត» ។

ពាក្យអង្វរសកល

សូមកោតសរសើរព្រះយេស៊ូជាព្រះសង្រ្គោះនៃយើង ដោយសារព្រះអង្គបានសោយទិវង្គត ទ្រង់បានបើកផ្លូវនៃការសង្រ្គោះឱ្យយើងខ្ញុំ។ យើងខ្ញុំសូមទូលព្រះអង្គថា ៖

បន្ទរ៖ ឱព្រះជាម្ចាស់អើយ ! សូមព្រះអង្គដឹកនាំប្រជារាស្រ្តព្រះអង្គ ឱ្យដើរតាមមាគ៌ារបស់ព្រះអង្គផង !

ឱព្រះជាម្ចាស់ដ៏មានធម៌មេត្តាករុណា ! តាមរយៈអគ្គសញ្ញាជ្រមុជទឹក ព្រះអង្គបានប្រទានជីវិតថ្មីឱ្យយើងខ្ញុំ
—សូមព្រះអង្គប្រោសឱ្យយើងខ្ញុំបានដូចជាព្រះអង្គពីមួយថ្ងៃទៅមួយថ្ងៃ។ (បន្ទរ)

សូមឱ្យចិត្តសប្បុរសរបស់យើងខ្ញុំ នាំអំណរសប្បាយទៅដល់អស់អ្នកដែលត្រូវការនៅថ្ងៃនេះ
—សូមឱ្យយើងរកឃើញព្រះអង្គ តាមរយៈការជួយដល់ពួកគេផង។ (បន្ទរ)

សូមជួយយើងខ្ញុំឱ្យធ្វើអ្វីដែលល្អ ត្រឹមត្រូវ និងសេចក្តីពិតនៅក្បែរព្រះអង្គ
—ហើយស្វែងរកព្រះអង្គជានិច្ច ជាមួយនឹងបេះដូងដែលមិនអាចបំបែកចេញពីគ្នាបាន។ (បន្ទរ)

សូមព្រះអង្គលើកលែងទោសបាបរបស់យើងខ្ញុំ ដែលប្រឆាំងទាស់នឹងការរួបរួមនៃក្រុមគ្រួសារព្រះអង្គ
—សូមប្រោសឱ្យយើងខ្ញុំមានចិត្តគំនិតតែមួយផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះជាម្ចាស់ដ៏សប្បុរសអើយ ! ព្រះអង្គសព្វព្រះហឫទ័យត្រាស់ហៅមនុស្សឲ្យស្គាល់ និងស្រឡាញ់ព្រះអង្គ។ សូមព្រះអង្គប្រោសប្រណីដល់យើងខ្ញុំ ជាពិសេស បងប្អូនដែលត្រៀមខ្លួនទទួលអគ្គសញ្ញាជ្រមុជទឹក ក្នុងបុណ្យចម្លងខាងមុខនេះ ឲ្យមានជីវិតថ្មីរួមជាមួយព្រះយេស៊ូគ្រីស្តជានិច្ច។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។