រដូវសែសិបថ្ងៃ

ថ្ងៃសៅរ៍ អាទិត្យទី១
_{(ពេលព្រឹក)}

ការអញ្ជើញមុនអធិដ្ឋាននៅពេលព្រឹក

• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ សូមអញ្ជើញមក យើងនាំគ្នាក្រាបថ្វាយបង្គំព្រះគ្រីស្ត ជាព្រះអម្ចាស់ ដ្បិតព្រះអង្គត្រូវល្បងល និងរងទុក្ខលំបាក ព្រោះតែយើងរាល់គ្នា។

ទំនុកតម្កើងតាមការជ្រើសរើស

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១៩,១៤៥-១៥២

វិន័យ​របស់​ព្រះ‌អម្ចាស់

សេចក្តីស្រឡាញ់នាំឱ្យប្រតិបត្តិតាមវិន័យបានពេញលក្ខណៈ (រ៉ូម ១៣,១០)។

បន្ទរទី១ ៖ ទូលបង្គំទន្ទឹងរង់ចាំព្រះអង្គតាំង​ពី​មុន​ថ្ងៃ​រះ​ទៅ​ទៀត។

១៤៥	បពិត្រព្រះអម្ចាស់! ទូលបង្គំអង្វរព្រះអង្គយ៉ាងអស់ពីចិត្ត សូមឆ្លើយតបមកទូលបង្គំផង ដើម្បីឱ្យទូលបង្គំ ប្រតិបត្តិតាមក្រឹត្យវិន័យរបស់ព្រះអង្គ!
១៤៦	ទូលបង្គំស្រែកអង្វរព្រះអង្គ សូមសង្គ្រោះទូលបង្គំផង ដើម្បីឱ្យទូលបង្គំ ប្រព្រឹត្តតាមដំបូន្មានរបស់ព្រះអង្គ!
១៤៧	ទូលបង្គំស្រែកហៅព្រះអង្គ តាំងពីមុនថ្ងៃរះទៅទៀត ទូលបង្គំទន្ទឹងរង់ចាំព្រះអង្គមានព្រះបន្ទូល។
១៤៨	ទូលបង្គំសញ្ជឹង​គិត​អំពី​ព្រះ‌បន្ទូល​សន្យារបស់​ព្រះ‌អង្គ​មួយ​យប់​ទល់​ភ្លឺ។
១៤៩	សូមស្តាប់ពាក្យអង្វររបស់ទូលបង្គំ ដោយព្រះហឫទ័យមេត្តាករុណា ឱព្រះអម្ចាស់អើយ! សូមជួយទូលបង្គំឱ្យរស់ឡើងវិញ តាមសេចក្តីដែលព្រះអង្គបានសម្រេចផង។
១៥០	អស់អ្នកដែលតាមព្យាបាទទូលបង្គំ នាំគ្នាចូលមកជិតទូលបង្គំ អ្នកទាំងនោះ ឃ្លាតចេញឆ្ងាយពីធម្មវិន័យរបស់ព្រះអង្គ។
១៥១	បពិត្រព្រះអម្ចាស់! ព្រះអង្គគង់នៅជិតទូលបង្គំ វិន័យទាំងប៉ុន្មានរបស់ព្រះអង្គ សុទ្ធតែត្រឹមត្រូវទាំងអស់
១៥២	តាំងពីយូរយារណាស់មកហើយ ទូលបង្គំដឹងថា ព្រះអង្គប្រទានដំបូន្មានឱ្យនៅស្ថិតស្ថេរអស់កល្បជានិច្ច។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ទូលបង្គំទន្ទឹងរង់ចាំព្រះអង្គតាំង​ពី​មុន​ថ្ងៃ​រះ​ទៅ​ទៀត។

បទលើកតម្កើងតាមគម្ពីរដំណើរឆ្ពោះទៅកាន់សេរីភាព (សរ ១៥,១-៤.៨-១៣.១៧-១៨)

ចម្រៀងនៃជ័យជម្នះ ក្រោយពីឆ្លងកាត់សមុទ្រក្រហម

អស់​អ្នក​ដែល​បាន​ឈ្នះ​សត្វ​តិរច្ឆាន….នាំគ្នាច្រៀងចម្រៀងរបស់លោកម៉ូសេ ជាអ្នក​បម្រើរបស់ព្រះជាម្ចាស់ (វវ ១៥,២-៣)។

បន្ទរទី២ ៖ ព្រះអម្ចាស់​ជា​កម្លាំង​របស់​ទូលបង្គំ ទូលបង្គំសូម​ច្រៀង​ថ្វាយ​ព្រះអង្គ ព្រះ‌អង្គ​សង្គ្រោះ​ទូលបង្គំ។

(បទពាក្យ ៧)

១-	ខ្ញុំស្រែកច្រៀងថ្វាយព្រះ	ជាអម្ចាស់ដែលមានជ័យ
	លើទ័ពសេះល្បាញល្បី	លិចលង់ក្ស័យក្នុងសមុទ្រ	។
២-	ព្រះម្ចាស់ជាកម្លាំង	ខ្ញុំឈ្នះខ្មាំងមិនភ័យស្លុត
	ខ្ញុំសូមឱនក្រាបលុត	ទាំងច្រៀងបទថ្កើងព្រះអង្គ	។
	ព្រោះទ្រង់បានសង្គ្រោះ	ខ្ញុំឲ្យរស់ផុតសៅហ្មង
	ព្រះឪពុកខ្ញុំផង	ព្រះខ្ពស់ខ្ពង់លើសអ្វីៗ	។
៣-	ទ្រង់ជាវីរបុរស	ប្រសើរខ្ពស់លើផែនដី
	អង់អាចពូកែក្រៃ	ព្រះនាមថ្លៃ “ព្រះអម្ចាស់	។
៤-	ព្រះអង្គបានធ្វើឲ្យ	កងទ័ពថយវិនាសអស់
	ទាំងទ័ពទាំងរទេះ	ត្រូវវិនាសក្នុងសមុទ្រ	។
៨-	ពេលខ្យល់បក់បោកមក	ទឹករលកផ្តុំគ្នាឡើង
	ទំនប់ទឹករលើង	មកនៅគឿងសមុទ្រជាន់	។
៩-	ខ្មាំងសត្រូវពោលថា	ខ្ញុំដេញគេតាមឲ្យទាន់
	ខ្ញុំទទួលជយភណ្ឌ	ច្រើនគ្រប់គ្រាន់ទើបចាត់ការ	។
១០-	ព្រះអង្គទ្រង់ផ្លុំខ្យល់	ទឹកវិលវល់គ្រប់កាយា
	ពួកគេលិចមរណា	ក្នុងជលសាដូចសំណ	។
១១-	បពិត្រព្រះអម្ចាស់	ប្រសើរណាស់ពេញបវរ
	តើមានព្រះណាល្អ	យុត្តិធម៌ដូចព្រះអង្គ ?	។
	ទ្រង់វិសុទ្ធរឿងរុង	អស្ចារ្យខ្លាំងពេកកន្លង
	គួរស្ញែងខ្លាចព្រឺផង	ហើយមានទាំងឫទ្ធីខ្ពស់	។
១២-	ព្រះអង្គក្តៅព្រះទ័យ	គ្មានប្រណីគិតស្រណោះ
	ពេលទ្រង់លើកព្រះហស្ត	ផែនដីប្រេះស្រូបគេឈឹង	។
១៣-	ព្រះអង្គបានលោះលា	រាស្រ្តគ្រប់គ្នាមានរំពឹង
	ដឹកនាំគេតម្រង់	ដំណាក់ទ្រង់ដ៏ឧត្តម	។
១៧-	ព្រះអង្គនាំប្រជា	រាស្រ្តគ្រប់គ្នាទៅលើភ្នំ
	ជាចំណែកដ៏ធំ	កន្លែងសំណាក់ព្រះអង្គ	។
	ឱព្រះអម្ចាស់អើយ	ព្រះអង្គហើយដែលបានសង់
	ទីសក្ការៈត្រចង់	ដោយហស្តទ្រង់កសាងផ្ទាល់	។
១៨-	ព្រះម្ចាស់នឹងគ្រងរាជ្យ	ពេញអំណាចអស់កប្បកល្ប
	ជានិច្ចគ្មានពិភាល់	ជារៀងរាល់អង្វែងទៅ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ ព្រះអម្ចាស់​ជា​កម្លាំង​របស់​ទូលបង្គំ ទូលបង្គំសូម​ច្រៀង​ថ្វាយ​ព្រះអង្គ ព្រះ‌អង្គ​សង្គ្រោះ​ទូលបង្គំ។

ទំនុកតម្កើងលេខ ១១៧

ចូរសរសើរតម្កើងព្រះអម្ចាស់ ! ដ្បិតព្រះអង្គមានព្រះហឫទ័យមេត្តាករុណា

រីឯសាសន៍ដទៃវិញ គេលើកតម្កើងសិរីរុងរឿងរបស់ព្រះជាម្ចាស់ ដោយព្រះអង្គ​សម្តែង​ព្រះហឫទ័យមេត្តាករុណាដល់គេ (រ៉ូម ១៥,៩)។

បន្ទរទី៣ ៖ ប្រជាជាតិទាំងឡាយអើយ ! ចូរសរសើរតម្កើងព្រះអម្ចាស់ !

១	ប្រជាជាតិទាំងឡាយអើយ! ចូរសរសើរតម្កើងព្រះអម្ចាស់! ប្រជារាស្ត្រទាំងប៉ុន្មានអើយ! ចូរលើកតម្កើងសិរីរុងរឿងរបស់ព្រះអង្គ!
២	ដ្បិតព្រះអង្គមានព្រះហឫទ័យមេត្តាករុណាចំពោះយើងពន់ពេកក្រៃ ព្រះអម្ចាស់មានព្រះហឫទ័យស្មោះស្ម័គ្រចំពោះយើងរហូតតរៀងទៅ។ សូមសរសើរតម្កើងព្រះអម្ចាស់។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ប្រជាជាតិទាំងឡាយអើយ ! ចូរសរសើរតម្កើងព្រះអម្ចាស់ !

ព្រះបន្ទូលរបស់ព្រះជាម្ចាស់ (អស ១,១៦-១៨)​

ចូរ​លាង​សំអាត និង​ជម្រះ​ខ្លួនឲ្យ​បាន​ស្អាត​បរិសុទ្ធ ! ចូរ​យក​អំពើ​ទុច្ចរិត​ចេញ​ពី​មុខ​យើង​ទៅ កុំ​ប្រព្រឹត្ត​អំពើ​អាក្រក់​ទៀត​ឡើយ ! ចូរ​រៀន​ធ្វើអំពើ​ល្អ ! ចូរ​ស្វែង​រក​យុត្តិ‌ធម៌ ! ចូរ​ណែ‌នាំ​អ្នក​ដែល​សង្កត់‌សង្កិន​គេឲ្យ​ដើរ​តាម​មាគ៌ា​ដ៏​ត្រឹមត្រូវ ! ចូរ​រក​យុត្តិ‌ធម៌​ឲ្យ​ក្មេង​កំព្រា ហើយ​ការ‌ពារ​ស្ត្រី‌មេម៉ាយ ! ព្រះ‌អម្ចាស់​មាន​ព្រះ‌បន្ទូល​ថា៖ ចូរ​មក យើង​ពិភាក្សា​ជា​មួយ​គ្នា ទោះ‌បី​អំពើ​បាប​របស់​អ្នក​រាល់​គ្នា​ខ្មៅ​កខ្វក់យ៉ាង​ណា​ក្តី ក៏​វា​នឹង​ប្រែ​ទៅ​ជា សដូច​សម្លី​វិញ​ដែរ ហើយ​ទោះ‌បី​វា​មាន​ពណ៌​ខ្មៅ​យ៉ាង​ណា​ក៏​ដោយ វា​នឹង​ប្រែ​ជា ស​ដូច​កប្បាស។

បន្ទរ៖ ព្រះ‌អម្ចាស់នឹងរំដោះទូលបង្គំ*ឲ្យរួចផុតពីអន្ទាក់។ បន្ទរឡើងវិញ៖…
-ដែលគេដាក់ចាំចាប់ទូល‌បង្គំ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ៖ ខ្ញុំ​សុំ​បញ្ជាក់​ប្រាប់​អ្នក​រាល់​គ្នា​ថា ចូរ​ស្រឡាញ់​ខ្មាំង​សត្រូវ​របស់​អ្នក​រាល់​គ្នា ព្រម​ទាំង​ទូល‌អង្វរ​ព្រះ‌ជាម្ចាស់ សូម​ព្រះ‌អង្គ​ប្រទាន​ពរ​ឲ្យ​អស់​អ្នក​ដែល​បៀត‌បៀន​អ្នក​រាល់​គ្នា​ផង។ ធ្វើដូច្នេះ អ្នក​រាល់​គ្នា​នឹង​បាន​ទៅ​ជា​បុត្រ​របស់​ព្រះ‌បិតា​ដែល​គង់​នៅ​ស្ថាន​បរម‌សុខ។

៦៨	”សូមលើកតម្កើងព្រះអម្ចាស់ ជាព្រះរបស់ជនជាតិអ៊ីស្រាអែល ដ្បិតទ្រង់សព្វព្រះហឫទ័យយាងមករំដោះប្រជារាស្ត្ររបស់ព្រះអង្គ។
៦៩	ទ្រង់បានប្រទានព្រះសង្គ្រោះដ៏មានឫទ្ធិមួយព្រះអង្គ ពីក្នុងចំណោមព្រះញាតិវង្សរបស់ព្រះបាទដាវីឌ ជាអ្នកបម្រើព្រះអង្គឱ្យមកយើង។
៧០	ព្រះជាម្ចាស់ប្រទានព្រះសង្គ្រោះនេះមកយើង ស្របនឹងព្រះបន្ទូលសន្យា ថ្លែងតាមរយៈព្យាការីរបស់ព្រះអង្គនៅជំនាន់ដើម
៧១	គឺព្រះអង្គសង្គ្រោះយើងឱ្យរួចពីកណ្តាប់ដៃរបស់ខ្មាំងសត្រូវ និងរួចពីអំណាចរបស់អ្នកដែលស្អប់យើង
៧២	ព្រះអង្គសម្ដែងព្រះហឫទ័យមេត្តាករុណាដល់បុព្វបុរសយើង ហើយគោរពតាមសម្ពន្ធមេត្រីរបស់ព្រះអង្គយ៉ាងស្មោះស្ម័គ្រ
៧៣	គឺព្រះអង្គបានសន្យាយ៉ាងម៉ឺងម៉ាត់ដល់លោកអប្រាហាំ ជាបុព្វបុរសរបស់យើងថា
៧៤	ទ្រង់នឹងរំដោះយើងឱ្យរួចពីកណ្តាប់ដៃរបស់ខ្មាំងសត្រូវ ដើម្បីយើងអាចគោរពបម្រើព្រះអង្គបានដោយឥតភ័យខ្លាច
៧៥	ព្រមទាំងឱ្យយើងរស់នៅបានបរិសុទ្ធ និងសុចរិតជាទីគាប់ព្រះហឫទ័យព្រះជាម្ចាស់ ជារៀងរាល់ថ្ងៃ រហូតអស់មួយជីវិត។
៧៦	ចំណែកឯកូនវិញ កូននឹងទៅជាព្យាការីរបស់ព្រះដ៏ខ្ពង់ខ្ពស់បំផុត ព្រោះកូននឹងដើរមុខព្រះអម្ចាស់ ដើម្បីរៀបចំផ្លូវថ្វាយព្រះអង្គ។
៧៧	កូននឹងឱ្យប្រជារាស្ត្ររបស់ព្រះអង្គដឹងថា ព្រះអង្គសង្គ្រោះគេ ដោយលើកលែងគេឱ្យរួចពីបាប។
៧៨	ព្រះរបស់យើងមានព្រះទ័យមេត្តាករុណាដ៏លើសលប់ ព្រះអង្គប្រទានថ្ងៃរះពីស្ថានលើមក ដើម្បីរំដោះយើង
៧៩	និងដើម្បីបំភ្លឺអស់អ្នកដែលស្ថិតនៅក្នុងទីងងឹត ក្រោមអំណាចនៃសេចក្តីស្លាប់ ព្រមទាំងតម្រង់ផ្លូវយើងឆ្ពោះទៅរកសេចក្តីសុខសាន្ត។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

ឬ ទំនុកតម្កើងរបស់លោកសាការី (តាមបែបស្មូត) បទពាក្យ ៧

៦៨-	សូមលើកតម្កើងព្រះអម្ចាស់	ប្រសើរពេកណាស់ព្រះរបស់
	ជាតិអ៊ីស្រាអែលធ្លាប់ស្ម័គ្រស្មោះ	យាងមករំដោះរាស្ត្រព្រះអង្គ	។
៦៩-	ទ្រង់បានប្រទានព្រះសង្គ្រោះ	ដែលមានឫទ្ធិខ្ពស់ដ៏ត្រចង់
	ពីក្នុងចំណោមព្រះញាតិវង្ស	នៃអង្គដាវីឌបម្រើជាក់	។
៧០-	ព្រះម្ចាស់ប្រទានព្រះសង្គ្រោះ	យើងមិនដែលលោះមិនដែលអាក់
	ដូចបានសន្យាតាមរយៈ	ព្យាការីធ្លាប់ស្ម័គ្រកាលគ្រាមុន	។
៧១-	ព្រះអង្គសង្គ្រោះយើងឱ្យរួច	ចេញពីអំណាចខ្មាំងលើសលន់
	និងផុតពីដៃពួកទុរជន	ដែលធ្លាប់ជិះជាន់ស្អប់ខ្ពើមយើង	។
៧២-	ព្រះអង្គសម្ដែងព្រះហឫទ័យ	ករុណាប្រណីមិនឆ្មៃឆ្មើង
	ដល់បុព្វបុរសដែលតម្កើង	សម្ពន្ធព្រះអង្គមិនភ្លេចសោះ	។
៧៣-	គឺព្រះអង្គហើយបានសន្យា	ពាក្យពិតសត្យាមិនចន្លោះ
	នឹងអប្រាហាំបុព្វបុរស	ដូនតាយើងនោះដូច្នេះថា	។
៧៤-	ទ្រង់នឹងរំដោះយើងឱ្យរួច	ផុតពីអំណាចខ្មាំងឫស្យា
	ដើម្បីយើងអាចក្រាបវន្ទា	ព្រះអង្គគ្រប់គ្រាគ្មានភ័យភិត	។
៧៥-	ព្រមទាំងឱ្យយើងបានរស់នៅ	ឥតមានអាស្រូវដោយសុចរិត
	ជារៀងរាល់ថ្ងៃមួយជីវិត	គាប់ព្រះទ័យពិតព្រះម្ចាស់ថ្លៃ	។
៧៦-	ចំណែកឯរូបរបស់កូន	នឹងក្លាយខ្លួនជាព្យាការី
	ព្រោះកូនដើរមុខព្រះម្ចាស់ថ្លៃ	រៀបផ្លូវល្អក្រៃថ្វាយព្រះអង្គ	។
៧៧-	កូននឹងធ្វើឱ្យអស់ប្រជា	រាស្ត្រទាំងអស់គ្នាគេបានដឹង
	ថាព្រះសង្គ្រោះគឺព្រះអង្គ	ទាំងលើកទោសផងរួចពីបាប	។
៧៨-	ព្រះរបស់យើងមានព្រះទ័យ	ករុណាប្រណីជាដរាប
	ទ្រង់ប្រទានថ្ងៃរះរៀងរាប	រំដោះរួចបាបយើងពិតៗ	។
៧៩-	សម្រាប់បំភ្លឺដល់អស់អ្នក	ដែលបាននៅស្នាក់ទីងងឹត
	ព្រមទាំងតម្រង់ផ្លូវជីវិត	យើងឆ្ពោះទៅរកក្តីសុខសាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ៖ ខ្ញុំ​សុំ​បញ្ជាក់​ប្រាប់​អ្នក​រាល់​គ្នា​ថា ចូរ​ស្រឡាញ់​ខ្មាំង​សត្រូវ​របស់​អ្នក​រាល់​គ្នា ព្រម​ទាំង​ទូល‌អង្វរ​ព្រះ‌ជាម្ចាស់ សូម​ព្រះ‌អង្គ​ប្រទាន​ពរ​ឲ្យ​អស់​អ្នក​ដែល​បៀត‌បៀន​អ្នក​រាល់​គ្នា​ផង។ ធ្វើដូច្នេះ អ្នក​រាល់​គ្នា​នឹង​បាន​ទៅ​ជា​បុត្រ​របស់​ព្រះ‌បិតា​ដែល​គង់​នៅ​ស្ថាន​បរម‌សុខ។

ពាក្យអង្វរសកល

ដើម្បីបង្កើតយើងខ្ញុំសាជាថ្មី ព្រះគ្រីស្តជាអម្ចាស់បានប្រទានទឹក និងព្រះកាយ ព្រមទាំងព្រះបន្ទូល ដែលផ្តល់ឱ្យយើងខ្ញុំកើតជាថ្មី។ ចូរយើងទូលអង្វរព្រះអង្គថា ៖

បន្ទរ៖ សូមព្រះអង្គបន្តប្រទានព្រះអំណោយទានឱ្យយើងខ្ញុំ !

ឱព្រះយេស៊ូដែលមានព្រះហឫទ័យស្លូតបូត និងសុភាពរាបសារ ! សូមព្រះអង្គបំពាក់យើងខ្ញុំនូវចិត្តមេត្តា ចិត្តសប្បុរស និងចេះដាក់ខ្លួន
—សូមប្រោសប្រទានឱ្យយើងខ្ញុំមានចិត្តអត់ធ្មត់ជាមួយនឹងមនុស្សគ្រប់គ្នាផង។ (បន្ទរ)

សូមព្រះអង្គបង្រៀនយើងខ្ញុំ ឱ្យក្លាយជាអ្នកជិតខាងពិតប្រាកដសម្រាប់មនុស្សទាំងអស់ នៅពេលពួកគេជួបបញ្ហា និងទុក្ខលំបាក
—ដូច្នេះ យើងខ្ញុំអាចយកតម្រាប់តាមព្រះអង្គ ជាសាសន៍សាម៉ារីដ៏ល្អ។ (បន្ទរ)

សូមព្រះនាងព្រហ្មចារិនីម៉ារីជាព្រះមាតា ជួយអង្វរព្រះអង្គឱ្យអស់អ្នកដែលថ្វាយពាក្យសច្ចាប្រណិធានរស់នៅជាព្រហ្មចារី
—ដូច្នេះ ពួកគេអាចលះបង់ខ្លួនឯងចោលកាន់តែជ្រៅទៅៗ ចំពោះព្រះអង្គ និងព្រះសហគមន៍។ (បន្ទរ)

សូមប្រោសប្រទានព្រះអំណោយទាននៃធម៌មេត្តារបស់ព្រះអង្គឱ្យយើងខ្ញុំ
—ហើយសូមព្រះអង្គអត់ទោសបាបរបស់យើងខ្ញុំ និងដកយកទណ្ឌកម្មរបស់ពួកគេផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាដែលគង់នៅអស់កល្បជានិច្ច ! ព្រះអង្គស្រឡាញ់មនុស្សលោកខ្លាំងណាស់។ សូមព្រះអង្គបង្វែរចិត្តគំនិតរបស់យើងខ្ញុំឲ្យបែរមករកព្រះអង្គវិញ ដោយប្រោសឲ្យយើងខ្ញុំស្រឡាញ់ និងហ៊ានថ្វាយជីវិតទាំងស្រុង ដើម្បីបម្រើព្រះអង្គក្នុងគ្រប់កិច្ចការទាំងអស់។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្តជាព្រះបុត្រាព្រះអង្គ និងជាអម្ចាស់យើងខ្ញុំ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅ ដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។