រដូវបុណ្យចម្លង សប្តាហ៍ទី២ ថ្ងៃអង្គារ

Posted on 29 ខែមេសា 20259 ខែមេសា 2025 by Siya Khim

រដូវបុណ្យចម្លង

សន្តីកាតារីន ជាព្រហ្មចារិនី
និងជាគ្រូបាធ្យាយនៃព្រះសហគមន៍ នៅទីក្រុងស៊ីយែន

(រំឭកចាំបាច់)

ថ្ងៃអង្គារ អាទិត្យទី២
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៤៩

កុំទុកចិត្តលើទ្រព្យសម្បត្តិ!

“អ្នកមានពិបាកចូលទៅក្នុងព្រះរាជ្យនៃស្ថានបរមសុខណាស់” (មថ ១៩,២៣)។

បន្ទរទី១ ៖ ចូរគិតពីអ្វីៗដែលនៅស្ថានលើ កុំគិតពីអ្វីនៅលើផែនដីនេះឡើយ អាលេលូយ៉ា!

(ក)

^២	ប្រជាជនទាំងឡាយអើយ! ចូរនាំគ្នាត្រងត្រាប់ស្តាប់! មនុស្សម្នាដែលរស់នៅលើផែនដីទាំងមូលអើយ! ចូរនាំគ្នាយកចិត្តទុកដាក់ស្តាប់!
^៣	គឺទាំងអ្នកតូច ទាំងអ្នកធំ ទាំងអ្នកមាន ទាំងអ្នកក្រ!
^៤	ខ្ញុំនឹងបរិយាយអំពីគតិបណ្ឌិត ខ្ញុំនឹងសម្តែងចេញនូវគោលគំនិតប្រកបដោយប្រាជ្ញា។
^៥	ខ្ញុំនឹងផ្ចង់ចិត្តស្តាប់ពាក្យប្រៀនប្រដៅរបស់អ្នកប្រាជ្ញ ខ្ញុំនឹងដោះស្រាយប្រស្នាទាំងលេងពិណកំដរផង។
^៦	នៅគ្រាមានអាសន្ន ឬពេលមានខ្មាំងសត្រូវមកឡោមព័ទ្ធ ខ្ញុំមិនភ័យខ្លាចអ្វីឡើយ។
^៧	មនុស្សអាក្រក់តែងតែទុកចិត្តលើទ្រព្យរបស់ខ្លួន គេអួតអាងព្រោះមានទ្រព្យសម្បត្តិស្តុកស្តម្ភ។
^៨	ពុំមាននរណាម្នាក់អាចលោះអ្នកដទៃបានឡើយ ហើយក៏ពុំអាចបង់ថ្លៃថ្វាយព្រះជាម្ចាស់ ដើម្បីលោះជីវិតរបស់ខ្លួនបានដែរ
^៩	តម្លៃលោះជីវិតរបស់មនុស្សថ្លៃណាស់ ទោះបីជាគេខំបង់ថ្លៃយ៉ាងណាក៏ដោយ ក៏មិនគ្រប់ដែរ។
^១០	តើមនុស្សអាចរស់រហូត គេចផុតពីរណ្តៅនៃមច្ចុរាជបានឬ?។
^១១	យើងឃើញច្បាស់ថា អ្នកប្រាជ្ញក៏ដូចជាមនុស្សឆោតល្ងង់អាប់ឥតប្រាជ្ញាដែរ គេត្រូវតែស្លាប់ទាំងអស់គ្នា ហើយទុកទ្រព្យសម្បត្តិខ្លួនឱ្យអ្នកដទៃ។
^១២	ខ្ញុំនឹកក្នុងចិត្តថា គេហដ្ឋានរបស់គេនឹងស្ថិតស្ថេររហូតតទៅ លំនៅដ្ឋានរបស់គេនៅគង់វង្សពីជំនាន់មួយទៅជំនាន់មួយ ហើយដាក់ឈ្មោះដីធ្លីរបស់គេ តាមឈ្មោះរបស់ខ្លួនថែមទៀត។
^១៣	មនុស្សដែលមានកិត្តិយសរុងរឿង ពុំអាចគេចផុតពីស្លាប់បានទេ គេនឹងត្រូវបាត់បង់ជីវិត ដូចសត្វតិរច្ឆាន។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ចូរគិតពីអ្វីៗដែលនៅស្ថានលើ កុំគិតពីអ្វីនៅលើផែនដីនេះឡើយ អាលេលូយ៉ា!

បន្ទរទី២ ៖ ព្រះអម្ចាស់បានរំដោះខ្ញុំឱ្យរួចពីស្លាប់ អាលេលូយ៉ា!

(ខ)

(បទកាកគតិ)

^១៤-	អ្នកដែលទុកចិត្ត	លើខ្លួនឯងពិត	នោះគ្មានមារយាទ
	ពេញចិត្តពាក្យខ្លួន	ជាមនុស្សមានស្នៀត	អនាគតទៀត
		យ៉ាប់យ៉ឺនពេកក្រៃ	។
^១៥-	អ្នកនោះប្រៀបបាន	ចៀមសត្វតិរច្ឆាន	ដែលគេប្រល័យ
	មច្ចុរាជឃុំគ្រង	វាយឥតសំចៃ	ឃ្វាលរាល់យប់ថ្ងៃ
		មិនឱ្យឃ្លាតឆ្ងាយ	។
	រីមនុស្សសុចរិត	នឹងជាន់ឈ្លីពិត	លើរូបរាងកាយ
	របស់ពួកគេ	រលាយអន្តរាយ	ទៅដល់ទីឆ្ងាយ
		ក្នុងស្ថានមនុស្សស្លាប់	។
^១៦-	ប៉ុន្តែព្រះម្ចាស់	មានឫទ្ធិខ្លាំងណាស់	រំដោះខ្ញុំឆាប់
	ផុតពីអំណាច	នៃសេចក្តីស្លាប់	ព្រះអង្គប្រញាប់
		មកយកខ្ញុំទៅ	។
^១៧-	ពេលអ្នកឃើញគេ	សម្បត្តិឡើងទ្វេ	កុំបីហ្មងសៅ
	ឃើញទ្រព្យគេច្រើន	ចម្រើនតទៅ	សំងំពួននៅ
		កុំភ័យខ្លាចអី	។
^១៨-	នៅពេលគេស្លាប់	គេពុំអាចចាប់	យករបស់អ្វី
	អស់ទាំងសម្បត្តិ	ទ្រព្យធនផ្សេងក្តី	ចូលទៅក្នុងដី
		អ្នកក្ស័យបានឡើយ	។
^១៩-	ពេលមានជីវិត	គេតែងនឹកគិត	ថាសុខឥតស្បើយ
	ថាខ្លួនគេនឹង	មិនខ្វល់អ្វីឡើយ	អ្នកផងកោតហើយ
		ដែលគេមានបាន	។
^២០-	គេគង់នឹងត្រូវ	ធ្លាក់ខ្លួនចុះទៅ	ជួបនឹងសន្តាន
	ជីតាជីដូន	មានទាំងប៉ុន្មាន	ទៅក្នុងទីស្ថាន
		ដែលគ្មានពន្លឺ	។
^២១-	អ្នកមានកិត្តិយស	រុងរឿងខ្ពង់ខ្ពស់	ល្បីល្បាញរន្ទឺ
	មិនយល់អ្វីសោះ	មិនភ័យព្រួយព្រឺ	អ្នកនោះហើយគឺ
		ដូចសត្វដែលស្លាប់	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កានឥតហ្មង
		ដែលគង់ជានិច្ច	។

បន្ទរ ៖ ព្រះអម្ចាស់បានរំដោះខ្ញុំឱ្យរួចពីស្លាប់ អាលេលូយ៉ា!

បទលើកតម្កើងតាមគម្ពីរវិវរណៈ (វវ ៤,១១.៥,៩-១០.១២)

ទំនុកតម្កើងសម្រាប់ការប្រោសលោះ

បន្ទរទី៣ ៖ ព្រះ‌អម្ចាស់អើយ ព្រះ‌អង្គជាព្រះដ៏ឧត្តុង្គ‌ឧត្ដម ប្រកបដោយឫទ្ធា‌នុភាព ព្រះ‌បារមី តេជា‌នុភាព និងសិរី‌រុងរឿង អាលេលូយ៉ា!

^១១	“បពិត្រព្រះអម្ចាស់ជាព្រះនៃយើងខ្ញុំ ព្រះអង្គសមនឹងទទួលសិរីរុងរឿង ព្រះកិត្តិនាម និងឫទ្ធានុភាព ដ្បិតព្រះអង្គបានបង្កើតរបស់សព្វសារពើមក អ្វីៗទាំងអស់សុទ្ធតែកើតមាន ហើយនៅស្ថិតស្ថេរ ដោយសារព្រះហឫទ័យរបស់ព្រះអង្គ” ។
^៩	គេនាំគ្នាច្រៀងបទចម្រៀងថ្មីថា៖ “ព្រះអង្គសមនឹងទទួលក្រាំង ហើយបកត្រាផង ព្រោះទ្រង់ត្រូវគេសម្លាប់ធ្វើយញ្ញបូជា ព្រះអង្គបានលោះមនុស្សពីគ្រប់ពូជ គ្រប់ភាសា គ្រប់ប្រជាជន និងពីគ្រប់ជាតិសាសន៍ យកមកថ្វាយព្រះជាម្ចាស់ ដោយសារព្រះលោហិតរបស់ព្រះអង្គ។
^១០	ព្រះអង្គបានធ្វើឱ្យគេទៅជារាជាណាចក្រ និងជាក្រុមបូជាចារ្យ បម្រើព្រះជាម្ចាស់របស់យើង ហើយអ្នកទាំងនោះនឹងគ្រងរាជ្យលើផែនដី” ។
^១២	នាំគ្នាបន្លឺសំឡេងយ៉ាងខ្លាំងៗថា៖ កូនចៀមដែលគេសម្លាប់ធ្វើយញ្ញបូជា ទ្រង់សមនឹងទទួលឫទ្ធានុភាព រាជសម្បត្តិ ព្រះប្រាជ្ញាញាណ ឥទ្ធិឫទ្ធិ ព្រះកិត្តិនាម សិរីរុងរឿង និងការសរសើរតម្កើង” ។

បន្ទរ ៖ ព្រះ‌អម្ចាស់អើយ ព្រះ‌អង្គជាព្រះដ៏ឧត្តុង្គ‌ឧត្ដម ប្រកបដោយឫទ្ធា‌នុភាព ព្រះ‌បារមី តេជា‌នុភាព និងសិរី‌រុងរឿង អាលេលូយ៉ា!

ព្រះបន្ទូលរបស់ព្រះជាម្ចាស់ (១សល ២,៤-៥)

សូមបង‌ប្អូនចូលមកជិតព្រះ‌គ្រីស្ត ជាសិលាដ៏មានជីវិត ជាសិលាដែលមនុស្សលោកបានបោះបង់ចោល តែព្រះ‌ជាម្ចាស់បានរើសយក ព្រោះព្រះ‌អង្គឈ្វេងយល់ថាមានតម្លៃវិសេស។ រីឯបង‌ប្អូនវិញ បង‌ប្អូនប្រៀបបាននឹងថ្មដ៏មានជីវិតដែរ ដូច្នេះ ចូរផ្គុំគ្នាឡើង កសាងជាព្រះ‌ដំណាក់របស់ព្រះ‌វិញ្ញាណ ធ្វើជាក្រុមបូជា‌ចារ្យដ៏‌វិសុទ្ធ ដើម្បីថ្វាយយញ្ញ‌បូជាខាងវិញ្ញាណ ជាទីគាប់ព្រះ‌ហឫទ័យព្រះ‌ជាម្ចាស់ តាម‌រយៈព្រះយេស៊ូ‌គ្រីស្ត។

បន្ទរ៖ ពួកសាវ័កសប្បាយចិត្តជាខ្លាំង *អាលេលូយ៉ា! អាលេលូយ៉ា!។ បន្ទរឡើងវិញ៖…
-ដោយបានឃើញព្រះអម្ចាស់មានព្រះជន្មរស់ឡើងវិញ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ សន្តីកាតារីនតែងតែស្វែងរកព្រះជាម្ចាស់គ្រប់ទីកន្លែង។ ដោយសារកម្លាំងនៃសេចក្តីស្រឡាញ់របស់នាង នាងបានចូលទៅក្នុងសហភាពរួមជាមួយព្រះអង្គ អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ សន្តីកាតារីនតែងតែស្វែងរកព្រះជាម្ចាស់គ្រប់ទីកន្លែង។ ដោយសារកម្លាំងនៃសេចក្តីស្រឡាញ់របស់នាង នាងបានចូលទៅក្នុងសហភាពរួមជាមួយព្រះអង្គ អាលេលូយ៉ា!

ពាក្យអង្វរសកល

ដោយព្រះគ្រីស្តមានព្រះជន្មរស់ឡើងវិញ ព្រះអង្គបានប្រទានសេចក្តីសង្ឃឹមដ៏ពិតប្រាកដដល់ប្រជារាស្រ្តព្រះអង្គ។ ចូរយើងទូលសូមព្រះអង្គឱ្យអស់ពីដួងចិត្តថា ៖

បន្ទរ៖ បពិត្រព្រះអម្ចាស់យេស៊ូ ដែលមានព្រះជន្មគង់នៅអស់កល្បជានិច្ច ! សូមព្រះសណ្តាប់ពាក្យអង្វរយើងខ្ញុំផង !

បពិត្រព្រះអម្ចាស់យេស៊ូ ! ព្រះលោហិត និងទឹកបានហូរចេញពីស្នាមរបួសត្រង់ឆ្នឹងជំនីរព្រះអង្គ
—សូមប្រោសឱ្យព្រះសហគមន៍របស់ព្រះអង្គធ្វើជាកូនក្រមុំ ដែលគ្មានស្លាកស្នាមផង។ (បន្ទរ)

ឱម្ចាស់គង្វាលទាំងឡាយអើយ ! ក្រោយព្រះអង្គមានព្រះជន្មរស់ ឡើងវិញ ព្រះអង្គបានធ្វើឱ្យលោកសិលាក្លាយជាគង្វាលហ្វូងចៀមរបស់ព្រះអង្គ នៅពេលលោកប្រកាសថាស្រឡាញ់ព្រះអង្គ
—សូមព្រះអង្គពង្រីកសេចក្តីស្រឡាញ់ និងការលះបង់របស់សម្តេចប៉ាបព្រះនាម…ពីមួយថ្ងៃទៅមួយថ្ងៃផង។ (បន្ទរ)

ព្រះអង្គបានបង្ហាញឱ្យពួកសាវ័កស្គាល់ពីរបៀបចាប់ត្រី ដែលល្អប្រសើរជាង
—សូមព្រះអង្គផ្ញើអ្នកដទៃឱ្យបន្តការងារជាអ្នកនេសាទមនុស្សពីអស់លោកផង។ (បន្ទរ)

នៅមាត់បឹង ព្រះអង្គបានរៀបចំនំប៉័ង និងត្រីសម្រាប់ពួកសាវ័ក
—សូមកុំឱ្យយើងខ្ញុំអនុញ្ញាតឱ្យអ្នកដទៃត្រូវស្លាប់ ដោយការអត់ឃ្លាននោះឡើយ។ (បន្ទរ)

ព្រះយេស៊ូជាលោកអដាំថ្មី និងមានវិញ្ញាណដែលផ្តល់ជីវិត សូមព្រះអង្គបំផ្លាស់បំប្រែមនុស្សស្លាប់ឱ្យមានលក្ខណៈដូចព្រះអង្គ
—ដើម្បីឱ្យអំណរសប្បាយដ៏ពេញបរិបូណ៌របស់ព្រះអង្គស្ថិតក្នុងពួកគេ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះអម្ចាស់ជាព្រះបិតា ! ព្រះអង្គប្រោសឱ្យសន្តីកាតារីនស្រឡាញ់ព្រះអង្គយ៉ាងខ្លាំងបំផុត ដោយនាងនឹកសញ្ជឹងគិតអំពីព្រះយេស៊ូរងទុក្ខលំបាក ហើយព្រះអង្គក៏ត្រាស់ហៅនាងឱ្យបម្រើព្រះសហគមន៍ផងដែរ។ សូមព្រះអង្គប្រោសឱ្យយើងខ្ញុំស្រឡាញ់ព្រះអង្គ ដោយរួមស្លាប់ជាមួយព្រះគ្រីស្ត និងពោរពេញក្នុងអំណរសប្បាយ ក្នុងសិរីរុងរឿងរបស់ព្រះអង្គ។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

6 Views

Post Views: 6