រដូវធម្មតា សប្តាហ៍ទី៣ ថ្ងៃសៅរ៍

Posted on 1 ខែកុម្ភៈ 202517 ខែមករា 2025 by Siya Khim

រដូវធម្មតា

ថ្ងៃសៅរ៍ សប្ដាហ៍ទី៣
_{(ពេលថ្ងៃ)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១៩

បន្ទរទី១ ៖ ឱព្រះអម្ចាស់អើយ! សូមប្រព្រឹត្តចំពោះទូលបង្គំដែលជាអ្នកបម្រើរបស់ព្រះអង្គ ដោយព្រះហឫទ័យមេត្តាករុណា។

^១២១	ទូលបង្គំប្រព្រឹត្តអំពើសុចរិតយុត្តិធម៌ សូមកុំឱ្យទូលបង្គំធ្លាក់ទៅក្នុងកណ្តាប់ដៃរបស់អស់អ្នកដែលសង្កត់សង្កិនទូលបង្គំឡើយ។
^១២២	សូមធានាឱ្យទូលបង្គំដែលជាអ្នកបម្រើព្រះអង្គ បានសេចក្តីសុខសាន្តផង សូមកុំទុកឱ្យមនុស្សអួតបំប៉ោងសង្កត់សង្កិនទូលបង្គំ។
^១២៤	សូមប្រព្រឹត្តចំពោះទូលបង្គំដែលជាអ្នកបម្រើរបស់ព្រះអង្គ ដោយព្រះហឫទ័យមេត្តាករុណា សូមបង្រៀនឱ្យទូលបង្គំស្គាល់ក្រិត្យវិន័យរបស់ព្រះអង្គផង!
^១២៥	ទូលបង្គំជាអ្នកបម្រើរបស់ព្រះអង្គ សូមប្រទានឱ្យទូលបង្គំចេះរិះគិតពិចារណាផង! ដើម្បីឱ្យទូលបង្គំស្គាល់ដំបូន្មានរបស់ព្រះអង្គ។
^១២៦	បពិត្រព្រះអម្ចាស់! ដល់ពេលព្រះអង្គយាងមកសង្គ្រោះហើយ ដ្បិតគេបានរំលោភលើធម្មវិន័យរបស់ព្រះអង្គ។
^១២៧	ទូលបង្គំស្រឡាញ់វិន័យរបស់ព្រះអង្គលើសអ្វីៗទាំងអស់ គឺលើសមាសសុទ្ធទៅទៀត។
^១២៨	ទូលបង្គំយល់ឃើញថា ច្បាប់ទាំងប៉ុន្មានរបស់ព្រះអង្គ សុទ្ធតែត្រឹមត្រូវទាំងអស់ ទូលបង្គំស្អប់ការអាក្រក់គ្រប់បែបយ៉ាង។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ឱព្រះអម្ចាស់អើយ! សូមប្រព្រឹត្តចំពោះទូលបង្គំដែលជាអ្នកបម្រើរបស់ព្រះអង្គ ដោយព្រះហឫទ័យមេត្តាករុណា។

ទំនុកតម្កើងលេខ ៣៤

ព្រះអម្ចាស់មានព្រះហឫទ័យសប្បុរសយ៉ាងក្រៃលែង!

បងប្អូនពិតជាបានក្រេបជញ្ជក់ដឹងថា ព្រះអម្ចាស់មានព្រះហឫទ័យសប្បុរសមែន! (១សល ២,៣)។

បន្ទរទី២ ៖ អ្នកណាសម្លឹងឆ្ពោះទៅព្រះ‌អង្គ អ្នកនោះនឹងបានពោរ‌ពេញទៅដោយអំណរ ហើយនឹងមិនខកចិត្តសោះឡើយ។

(ក)

(បទកាកគតិ)

^២-	ខ្ញុំអរព្រះគុណ	អម្ចាស់ពេកពន់	គ្រប់ពេលវេលា
	សូមលើកតម្កើង	ព្រះអង្គគ្រប់គ្រា	ឥតមានរួញរា
		ឈប់ឈរសោះឡើយ	។
^៣-	ខ្ញុំខ្ពស់មុខព្រោះ	ព្រះម្ចាស់សង្គ្រោះ	ខ្ញុំមិនកន្តើយ
	ចូរអ្នកទន់ទាប	ស្តាប់កុំព្រងើយ	នឹងបានធូរស្បើយ
		អំណរខ្លាំងក្លា	។
^៤-	សូមមកប្រកាស	នឹងខ្ញុំឱ្យច្បាស់	ដោយពោលឡើងថា
	ព្រះម្ចាស់ថ្កុំថ្កើង	រុងរឿងក្រៃណា	យើងនាំគ្នីគ្នា
		តម្កើងព្រះអង្គ	។
^៥-	ខ្ញុំបានស្វែងរក	ព្រះម្ចាស់តបមក	ឥតមានបង្អង់
	ទ្រង់បានរំដោះ	ខ្ញុំអស់ទុក្ខផង	តក់ស្លុតមួរហ្មង
		ឆ្លងផុតទាំងអស់	។
^៦-	អ្នកដែលសម្លឹង	ឆ្ពោះទៅព្រះអង្គ	បានសុខឥតមោះ
	ផុតអស់ទុក្ខសោក	វិយោគរងគ្រោះ	ពួកគេទាំងនោះ
		មិនខកចិត្តឡើយ	។
^៧-	អស់អ្នកកំសត់	និងមនុស្សទុរគត	គេស្រែកដង្ហោយ
	ហៅរកព្រះអង្គ	ទ្រង់សណ្តាប់ហើយ	សង្គ្រោះគេឱ្យ
		ផុតពីគ្រោះកាច	។
^៨-	ទេវទូតរបស់	ព្រះម្ចាស់ទាំងអស់	ថែទាំអ្នកខ្លាច
	រក្សាការពារ	គេក្រោមអំណាច	រំដោះឱ្យរួច
		ផុតពីទុក្ខភ័យ	។
^៩-	ចូរអ្នកផ្អែកពឹង	ពិសោធន៍ឱ្យដឹង	ថាព្រះម្ចាស់ថ្លៃ
	ទ្រង់មានមេត្តា	សប្បុរសពេកក្រៃ	អស់ជនប្រុសស្រី
		មានជ័យមង្គល	។
^១០-	ឱប្រជារាស្ត្រ	របស់ព្រះម្ចាស់	ចូរកោតខ្លាចដល់
	ព្រះម្ចាស់នៃយើង	បានសុខឥតខ្វល់	មិនជួបអំពល់
		ឬខ្វះខាតអ្វី	។
^១១-	អ្នកមានមុខជា	ជួបទុក្ខវេទនា	ខ្វះម្ហូបចំណី
	តែអ្នកដែលស្វែង	រកព្រះម្ចាស់ថ្លៃ	នឹងមិនខ្វះអ្វី
		សុខសាន្តតទៅ	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កើនឥតហ្មង
		ដែលគង់ជានិច្ច	។

បន្ទរ ៖ អ្នកណាសម្លឹងឆ្ពោះទៅព្រះ‌អង្គ អ្នកនោះនឹងបានពោរ‌ពេញទៅដោយអំណរ ហើយនឹងមិនខកចិត្តសោះឡើយ។

បន្ទរទី៣ ៖ ព្រះអម្ចាស់គង់នៅជិតអស់អ្នកដែលគ្រាំចិត្ត។

(ខ)

^១២	កូនចៅអើយ! ចូរនាំគ្នាស្តាប់ពាក្យខ្ញុំ ខ្ញុំនឹងប្រៀនប្រដៅអ្នកឱ្យចេះគោរពកោតខ្លាចព្រះអម្ចាស់
^១៣	តើមាននរណាចង់បានអាយុវែង និងចង់រស់នៅប្រកបដោយសុភមង្គលឬទេ?
^១៤	ចូរទប់អណ្តាតកុំពោលពាក្យអាក្រក់ និងចៀសវាងនិយាយបោកបញ្ឆោត!។
^១៥	ចូរងាកចេញពីអំពើអាក្រក់ ហើយប្រព្រឹត្តអំពើល្អវិញ ចូរខិតខំស្វែងរកសេចក្តីសុខសាន្តយ៉ាងអស់ពីចិត្ត។
^១៦	ព្រះអម្ចាស់តែងតែរំពៃមើលមនុស្សសុចរិត ព្រះអង្គក៏យកព្រះហឫទ័យទុកដាក់នឹងសម្រែករបស់ពួកគេ។
^១៧	ព្រះអម្ចាស់តែងតែប្រឆាំងនឹងអស់អ្នក ដែលប្រព្រឹត្តអំពើអាក្រក់ កុំឱ្យមាននរណានឹកនាដល់ពួកគេទៀតឡើយ។
^១៨	ពេលមនុស្សសុចរិតស្រែករកព្រះអម្ចាស់ ព្រះអង្គទ្រង់ព្រះសណ្តាប់ពាក្យគេ ព្រះអង្គរំដោះពួកគេឱ្យរួចពីគ្រោះកាចទាំងប៉ុន្មាន។
^១៩	ព្រះអម្ចាស់គង់នៅជិតអស់អ្នកដែលគ្រាំចិត្ត ព្រះអង្គសង្គ្រោះអស់អ្នកដែលមានចិត្តសោកសង្រេង។
^២០	មនុស្សសុចរិតរមែងជួបនឹងទុក្ខលំបាកជាច្រើន ប៉ុន្តែ ព្រះអម្ចាស់តែងតែរំដោះគេឱ្យរួចផុតគ្រប់ពេលវេលា។
^២១	ព្រះអង្គតាមថែរក្សាគេជានិច្ច គ្មានឆ្អឹងណាមួយត្រូវបាក់បែកឡើយ។
^២២	អំពើអាក្រក់តែងបណ្តាលឱ្យមនុស្សពាលបាត់បង់ជីវិត អ្នកដែលប្រឆាំងនឹងមនុស្សសុចរិត តែងតែទទួលទោសពុំខាន។
^២៣	ព្រះអម្ចាស់សង្គ្រោះជីវិតអ្នកបម្រើរបស់ព្រះអង្គ អស់អ្នកដែលមកពឹងផ្អែកលើព្រះអង្គ តែងតែរួចផុតពីទុក្ខទោស។

បន្ទរ ៖ ព្រះអម្ចាស់គង់នៅជិតអស់អ្នកដែលគ្រាំចិត្ត។

ព្រះបន្ទូលរបស់ព្រះជាម្ចាស់

ម៉ោង៩ ព្រឹក

ព្រះបន្ទូលរបស់ព្រះជាម្ចាស់ (៩ ព្រឹក) ១សម ១៥,២២

«តើព្រះអម្ចាស់សព្វព្រះ‌ហឫទ័យនឹងតង្វាយដុតទាំងមូល ព្រមទាំងយញ្ញ‌បូជា ខ្លាំងជាងការស្ដាប់បង្គាប់ព្រះ‌អង្គឬ? ទេ! ការស្ដាប់បង្គាប់ប្រសើរជាងថ្វាយយញ្ញ‌បូជាទៅទៀត ការយកចិត្តទុកដាក់ស្ដាប់ ក៏ប្រសើរជាងការថ្វាយខ្លាញ់ចៀមឈ្មោលដែរ»។

បន្ទរ៖ អ្នកលើកតម្កើងយើង គឺអ្នកដែលថ្វាយពាក្យអរព្រះ‌គុណទុកជាតង្វាយ។
—ហើយយើងនឹងសង្គ្រោះអស់អ្នកដែលដើរតាមមាគ៌ារបស់យើង។

ពាក្យអធិដ្ឋាន

បពិត្រព្រះជាម្ចាស់ជាព្រះបិតា ដ៏មានឫទ្ធានុភាពសព្វប្រការ! សូមព្រះអង្គចាត់ពន្លឺនៃព្រះវិញ្ញាណដ៏វិសុទ្ធមកលើប្រជារាស្រ្តព្រះអង្គ ដើម្បីឱ្យយើងខ្ញុំរួចផុតពីគ្រោះថ្នាក់របស់ខ្មាំងសត្រូវទាំងឡាយ ហើយយើងខ្ញុំអាចច្រៀងកោតសរសើរព្រះអង្គ ដោយអំណរសប្បាយផង។
យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

ម៉ោង១២ ថ្ងៃត្រង់

ព្រះបន្ទូលរបស់ព្រះជាម្ចាស់ (១២ ថ្ងៃត្រង់) កាឡ ៥,២៦.៦,២

យើងមិនត្រូវអួតបំប៉ោង រករឿងគ្នាទៅវិញទៅមក និងឈ្នានីសគ្នានោះឡើយ។ ត្រូវជួយរំលែកទុក្ខ‌ធុរៈគ្នាទៅវិញទៅមក ធ្វើយ៉ាងនេះ ទើបបង‌ប្អូនបំពេញតាមវិន័យរបស់ព្រះ‌គ្រីស្តទាំងស្រុង។

បន្ទរ៖ ការដែលបង‌ប្អូននៅរួមរស់ជាមួយគ្នា គឺជាការល្អប្រពៃ និងសប្បាយក្រៃលែង។
—ជាកន្លែងដែលព្រះអម្ចាស់ប្រទានព្រះពរ។

ពាក្យអធិដ្ឋាន

បពិត្រព្រះអម្ចាស់ ! សូមព្រះអង្គបំពេញយើងខ្ញុំជាមួយនឹងពន្លឺដ៏រីករាយនៃព្រះហឫទ័យស្រឡាញ់របស់ព្រះអង្គអស់កល្បជានិច្ច។ សូមឱ្យយើងខ្ញុំស្រឡាញ់ព្រះអង្គលើសអ្វីៗទាំងអស់ និងស្រឡាញ់បងប្អូនឯទៀតៗផង។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

ម៉ោង៣ រសៀល

ព្រះបន្ទូលរបស់ព្រះជាម្ចាស់ (៣ រសៀល) មីក ៦,៨

ឱមនុស្សអើយ! គេបានប្រៀនប្រដៅអ្នកឱ្យស្គាល់ការណាដែលល្អ និងការណាដែលព្រះអម្ចាស់សព្វព្រះហឫទ័យឱ្យអ្នកធ្វើ គឺអ្នកត្រូវប្រតិបត្តិតាមយុត្តិធម៌ ស្រឡាញ់ភាពស្មោះត្រង់ ហើយយកចិត្តទុកដាក់ដើរតាមមាគ៌ានៃព្រះរបស់អ្នក។

បន្ទរ៖ ទូល‌បង្គំពេញចិត្តនឹងវិន័យរបស់ព្រះ‌អង្គខ្លាំងណាស់។
—ទូលបង្គំមិនភ្លេចព្រះ‌បន្ទូលរបស់ព្រះ‌អង្គឡើយ។

ពាក្យអធិដ្ឋាន

បពិត្រព្រះអម្ចាស់ ! សូមប្រោសឱ្យសន្តិភាពដែលយើងខ្ញុំទូលសូម អាចកើតឡើងយ៉ាងពិតប្រាកដ សូមឱ្យជីវិតរស់នៅប្រចាំថ្ងៃរបស់យើងខ្ញុំ ពោរពេញដោយអំណរសប្បាយ ហើយតាមរយៈពាក្យទូលអង្វររបស់ព្រះនាងព្រហ្មចារិនីម៉ារី សូមឱ្យយើងខ្ញុំអាចចូលក្នុងព្រះរាជ្យរបស់ព្រះអង្គយ៉ាងសុខសាន្តផង។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

សូមកោតសរសើរព្រះអម្ចាស់!
សូមអរព្រះគុណព្រះអម្ចាស់!

47 Views

Post Views: 48