រដូវធម្មតា សប្តាហ៍ទី៣ ថ្ងៃសុក្រ

Posted on 31 ខែមករា 202517 ខែមករា 2025 by Siya Khim

រដូវធម្មតា

សន្តយ៉ូហានបូស្កូ ជាបូជាចារ្យ

(រំឭកចាំបាច់)

ថ្ងៃសុក្រ សប្ដាហ៍ទី៣
_{(ពេលថ្ងៃ)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ២២

ព្រះជាម្ចាស់សណ្តាប់ឮទុក្ខលំបាករបស់ជនដ៏វិសុទ្ធ

ព្រះ‌យេស៊ូស្រែកអង្វរខ្លាំងៗថា៖ «ឱព្រះ‌នៃទូល‌បង្គំ ព្រះ‌នៃទូល‌បង្គំអើយ ហេតុអ្វីបានជាព្រះ‌អង្គបោះ‌បង់ទូល‌បង្គំចោលដូច្នេះ?» (មថ ២៧,៤៦)។

បន្ទរទី១ ៖ លោកជាមនុស្សដែលត្រូវគេមើល‌ងាយ គ្មាននរណារាប់‌រក លោកជាមនុស្សស្គាល់តែការឈឺចាប់ និងរងទុក្ខវេទនា។

(ក)

^២	ឱព្រះនៃទូលបង្គំ! ឱព្រះនៃទូលបង្គំអើយ! ហេតុអ្វីបានជាព្រះអង្គបោះបង់ចោលទូលបង្គំដូច្នេះ? ទូលបង្គំស្រែកអង្វរ តែពុំឃើញព្រះអង្គសង្គ្រោះទូលបង្គំសោះ។
^៣	ឱព្រះនៃទូលបង្គំអើយ! ទូលបង្គំស្រែកហៅរកព្រះអង្គនៅពេលថ្ងៃ តែព្រះអង្គមិនឆ្លើយតបទេ នៅពេលយប់ក៏ទូលបង្គំស្រែកដែរ តែមិនបានធូរស្បើយឡើយ។
^៤	ប៉ុន្តែ ព្រះអង្គជាព្រះដ៏វិសុទ្ធដែលគង់នៅលើបល្ល័ង្ក ជនជាតិអ៊ីស្រាអែលតែងនាំគ្នាសរសើរតម្កើងព្រះអង្គ។
^៥	បុព្វបុរសរបស់យើងខ្ញុំតែងតែផ្ញើជីវិតលើព្រះអង្គ អស់លោកផ្ញើជីវិតលើព្រះអង្គជានិច្ច ព្រះអង្គក៏បានរំដោះអស់លោក។
^៦	លោកស្រែកអង្វររកព្រះអង្គ លោកក៏បានរួចពីខ្មាំងសត្រូវ ដោយផ្ញើជីវិតលើព្រះអង្គ ពួកលោកនឹងមិនខកចិត្តឡើយ។
^៧	រីឯទូលបង្គំវិញ គេលែងចាត់ទុកទូលបង្គំថាជាមនុស្សទៀតហើយ គឺគេចាត់ទុកជាជន្លេន មនុស្សម្នានាំគ្នាជេរប្រមាថ ហើយមាក់ងាយទូលបង្គំ។
^៨	អស់អ្នកដែលឃើញទូលបង្គំ ចំអកឱ្យទូលបង្គំគ្រប់ៗគ្នា គេពេបជ្រាយដាក់ទូលបង្គំ ព្រមទាំងគ្រវីក្បាលដាក់ទូលបង្គំផង។
^៩	គេពោលថា “គាត់ផ្ញើវាសនាលើព្រះអម្ចាស់ហើយ ឱ្យព្រះអង្គរំដោះគាត់ទៅ បើព្រះអង្គស្រឡាញ់គាត់ ឱ្យព្រះអង្គសង្គ្រោះគាត់ទៅ!” ។
^១០	ឱព្រះអម្ចាស់អើយ ព្រះអង្គបានប្រោសឱ្យទូលបង្គំចេញពីផ្ទៃម្តាយមក ព្រះអង្គក៏បានផ្ញើទូលបង្គំទៅឱ្យអ្នកម្តាយបំបៅ។
^១១	កាលពីទូលបង្គំកើតមក ព្រះអង្គបានទទួលទូលបង្គំធ្វើជាកូន ព្រះអង្គជាព្រះរបស់ទូលបង្គំ តាំងពីមុនពេលដែលទូលបង្គំស្គាល់ពន្លឺថ្ងៃទៅទៀត។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ លោកជាមនុស្សដែលត្រូវគេមើល‌ងាយ គ្មាននរណារាប់‌រក លោកជាមនុស្សស្គាល់តែការឈឺចាប់ និងរងទុក្ខវេទនា។

បន្ទរទី២ ៖ គេយកសម្លៀក‌បំពាក់ទូល‌បង្គំទៅចែកគ្នា និងនាំគ្នាចាប់ឆ្នោតយកអាវវែងរបស់ទូល‌បង្គំ។

(ខ)

(បទកាកគតិ)

^១២-	ពេលខ្ញុំជួបភ័យ	អាសន្នខ្លាំងក្រៃ	គ្មានអ្នកដឹងឮ
	មិនមានអ្នកជួយ	ផុតភ័យព្រួយព្រឺ	សូមទ្រង់ដឹងឮ
		កុំទៅឆ្ងាយខ្ញុំ	។
^១៣-	សត្រូវច្រើននាក់	ចោមរោមពួនស្ទាក់	រួមរឹតជិតជុំ
	ប្រៀបបានគោបា	ឡោមព័ទ្ធរូបខ្ញុំ	ដូចគោមកចោម
		ពីស្រុកបាសាន	។
	ពួកគេប្រឹងបើក	មាត់គេកម្រើក	ប្រឆាំងឥតស្រាន្ត
	នឹងទូលបង្គំ	ដូចសិង្ហសាមាន្យ	បម្រុងហែកប្រាណ
		ស៊ីជាអាហារ	។
^១៥-	កម្លាំងខ្ញុំខ្សោយ	មិនត្រឡប់ឡើយ	ដូចខ្សែជលសា
	ដែលហូរធ្លាក់ទៅ	មិនវិលឡើយណា	ឆ្អឹងសាច់ផងរ៉ា
		រលេះបាត់អស់	។
	ទឹកចិត្តក្លាហាន	ដែលខ្ញុំធ្លាប់មាន	បែរជាហេវខ្សោះ
	បីដូចក្រមួន	រលាយរលោះ	ឥតមានសល់សោះ
		ព្រោះកម្តៅថ្ងៃ	។
^១៦-	បំពង់កស្ងួត	ដូចដីប្រេះហួត	ស្គមស្គាំងរីងរៃ
	អណ្តាតខ្ញុំស្អិត	ដិតជាប់ពេកក្រៃ	ទ្រង់ឱ្យខ្ញុំក្ស័យ
		ចូលទៅក្នុងដី	។
^១៧-	ពួកឆ្កែព័ទ្ធខ្ញុំ	មានជនមួយក្រុម	វាមកញាំញី
	ជាជនទុរយស	ក្រវែលគ្រប់ទី	ទម្លុះជីវី
		ជើងដៃខ្លួនប្រ្រាណ	។
^១៨-	រូបខ្ញុំអាចរាប់	ឆ្អឹងជំនីរគ្រប់	មានទាំងប៉ុន្មាន
	សត្រូវទុយ៌ស	ចិត្តដូចតិរច្ឆាន	សម្លក់រំខាន
		សម្លឹងមកខ្ញុំ	។
^១៩-	ពួកគេដោះយក	ខោអាវខ្ញុំមក	ចែកចាយគ្នាជុំ
	នាំគ្នាចាប់ឆ្នោត	យកខោអាវខ្ញុំ	ធ្វើដោយមិនសម
		ជាល្បែងសប្បាយ	។
^២០-	ឱព្រះម្ចាស់អើយ	កុំនៅកន្តើយ	ឱ្យខ្ញុំឃ្លាតឆ្ងាយ
	ទ្រង់ជាកម្លាំង	គាំទ្ររាងកាយ	សូមយាងមកអាយ
		សង្គ្រោះប្រញាប់	។
^២១-	សូមដោះលែងខ្ញុំ	ឱ្យផុតទុក្ខធំ	បានលឿនឆាប់ៗ
	ផុតពីមុខដាវ	ដែលគេចាក់កាប់	សូមជួយប្រញាប់
		ពីចង្កូមឆ្កែ	។
^២២-	សូមសង្គ្រោះខ្ញុំ	ឱ្យផុតទុក្ខធំ	ពីមាត់សឹង្ហដែរ
	ឱ្យផុតពីស្នែង	សូមជួយបំបែរ	ឆ្លើយតបកុំល្ហែ
		មកទូលបង្គំ	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កើនឥតហ្មង
		ដែលគង់ជានិច្ច	។

បន្ទរ ៖ គេយកសម្លៀក‌បំពាក់ទូល‌បង្គំទៅចែកគ្នា និងនាំគ្នាចាប់ឆ្នោតយកអាវវែងរបស់ទូល‌បង្គំ។

បន្ទរទី៣ ៖ ប្រជា‌ជាតិទាំងមូលនឹងនាំគ្នាក្រាបថ្វាយ‌បង្គំព្រះ‌អង្គ។

(គ)

^២៣	ទូលបង្គំនឹងថ្លែងអំពីព្រះនាមរបស់ព្រះអង្គ ឱ្យបងប្អូនទូលបង្គំស្គាល់ ទូលបង្គំនឹងលើតម្កើងព្រះអង្គនៅក្នុងអង្គប្រជុំ។
^២៤	អ្នករាល់គ្នាដែលគោរពកោតខ្លាចព្រះអម្ចាស់អើយ! ចូរសរសើរតម្កើងព្រះអង្គ! អ្នកទាំងអស់ដែលជាពូជពង្សលោកយ៉ាកុបអើយ! ចូរលើកតម្កើងសិរីរុងរឿងរបស់ព្រះអង្គ!
^២៥	ព្រះអង្គមិនបោះបង់ចោល ឬធ្វើព្រងើយកន្តើយនឹងមនុស្សទុគ៌ត មានទុក្ខវេទនាទេ ព្រះអង្គមិនលាក់ព្រះភក្ត្រចំពោះគេឡើយ ពេលមនុស្សទុគ៌តស្រែកអង្វររកព្រះអង្គ ទ្រង់ព្រះសណ្តាប់គេ។
^២៦	ដោយព្រះអង្គបានប្រោសប្រណីដល់ទូលបង្គំ ទូលបង្គំលើកតម្កើងព្រះអង្គនៅក្នុងអង្គប្រជុំដ៏ធំ ទូលបង្គំនឹងលាបំណន់នៅមុខអស់អ្នកគោរពកោតខ្លាចព្រះអង្គ។
^២៧	មនុស្សទន់ទាបបរិភោគឆ្អែតស្កប់ស្កល់ អស់អ្នកដែលស្វែងរកព្រះអម្ចាស់ នឹងនាំគ្នាសរសើរតម្កើងព្រះអង្គ។ ចូរឱ្យអ្នករាល់គ្នាអាយុយឺនយូរ និងបានសេចក្តីសុខសាន្ត!
^២៨	មនុស្សទាំងប៉ុន្មានដែលនៅលើផែនដីទាំងមូល នឹងនឹកឃើញព្រះអម្ចាស់ ហើយនាំគ្នាវិលមករកព្រះអង្គវិញ ប្រជាជាតិទាំងឡាយនឹងនាំគ្នាក្រាបថ្វាយបង្គំព្រះអង្គ
^២៩	ព្រះអម្ចាស់ជាព្រះមហាក្សត្រ ព្រះអង្គគ្រប់គ្រងលើប្រជាជាតិនានា។
^៣០	ពួកអ្នកធំទាំងប៉ុន្មាននៅលើផែនដី នាំគ្នាក្រាបថ្វាយបង្គំព្រះអង្គ អស់មនុស្សលោកដែលរមែងតែងស្លាប់ ក៏នាំគ្នាក្រាបថ្វាយបង្គំព្រះអង្គដែរ។
^៣១	មនុស្សនៅជំនាន់ក្រោយនឹងគោរពបម្រើព្រះអម្ចាស់ ហើយគេនឹងថ្លែងអំពីព្រះអង្គប្រាប់កូនចៅ។
^៣២	គេប្រកាសប្រាប់ប្រជាជនដែលនឹងកើតមកតាមក្រោយ អំពីសេចក្តីសុចរិតរបស់ព្រះអង្គ គឺព្រះអម្ចាស់បានរំដោះប្រជារាស្ត្ររបស់ព្រះអង្គ។

បន្ទរ ៖ ប្រជា‌ជាតិទាំងមូលនឹងនាំគ្នាក្រាបថ្វាយ‌បង្គំព្រះ‌អង្គ។

ព្រះបន្ទូលរបស់ព្រះជាម្ចាស់

ម៉ោង៩ ព្រឹក

ព្រះបន្ទូលរបស់ព្រះជាម្ចាស់ (៩ ព្រឹក) រ៉ូម ១,១៦ខ-១៧

ដំណឹងល្អនេះជាឫទ្ធានុភាពរបស់ព្រះ‌ជាម្ចាស់ សម្រាប់សង្គ្រោះអស់អ្នកដែលជឿ គឺមុនដំបូងសាសន៍យូដា បន្ទាប់មក សាសន៍ក្រិក។ ដំណឹង‌ល្អនេះសម្ដែងឱ្យដឹងថា ព្រះ‌ជាម្ចាស់ប្រោសប្រទានឱ្យមនុស្សសុចរិត ដោយ‌សារជំនឿ និងឱ្យគេកាន់តាមជំនឿ ដូចមានចែងទុកមកថាៈ «មនុស្សសុចរិតមានជីវិតរស់ ដោយ‌សារជំនឿ»។

បន្ទរ៖ យើងមានអំណរសប្បាយ ដោយរួមជាមួយព្រះអង្គ។
—យើងទុកចិត្តលើព្រះ‌នាមដ៏‌វិសុទ្ធរបស់ព្រះ‌អង្គ។

ពាក្យអធិដ្ឋាន

បពិត្រព្រះយេស៊ូគ្រីស្តជាអម្ចាស់ ! នៅវេលានេះ ព្រះអង្គត្រូវគេនាំយកទៅឆ្កាង ឱ្យសោយទិវង្គតលើឈើឆ្កាង សម្រាប់ការសង្គ្រោះពិភពលោក។ យើងខ្ញុំសូមព្រះអង្គលើកលែងទោសសម្រាប់អំពើបាប ដែលយើងខ្ញុំបានប្រព្រឹត្តកាលពីអតីតកាល ហើយសូមព្រះអង្គការពារយើងខ្ញុំពីសេចក្តីអាក្រក់ទាំងឡាយ នៅពេលអនាគតផង។ សូមនាំយើងខ្ញុំទៅរកសេចក្តីសុខសាន្ត និងអំណរសប្បាយ ក្នុងព្រះរាជ្យដែលព្រះអង្គគង់នៅ និងសោយរាជ្យអស់កល្បជាអង្វែងតរៀងទៅ។ អាម៉ែន!

ម៉ោង១២ ថ្ងៃត្រង់

ព្រះបន្ទូលរបស់ព្រះជាម្ចាស់ (១២ ថ្ងៃត្រង់) រ៉ូម ៣,២១-២២ក

ឥឡូវនេះ ព្រះ‌ជាម្ចាស់សម្ដែងឱ្យយើងដឹង អំពីរបៀបព្រះ‌អង្គប្រោសមនុស្សឱ្យសុចរិត គឺព្រះ‌អង្គមិនគិតពីវិន័យទេ ដូចគម្ពីរ‌វិន័យ និងគម្ពីរព្យាការីបានបញ្ជាក់ទុកស្រាប់។ ព្រះ‌ជាម្ចាស់ប្រោសអ្នកដែលមានជំនឿលើព្រះ‌យេស៊ូ‌គ្រីស្ដឱ្យសុចរិត គឺព្រះ‌អង្គធ្វើដូច្នេះចំពោះអស់អ្នកដែលជឿ។

បន្ទរ៖ វិន័យរបស់ព្រះ‌អម្ចាស់ល្អឥតខ្ចោះ ធ្វើឱ្យមានកម្លាំងចិត្តឡើងវិញ។
—ព្រះ‌បណ្ដាំរបស់ព្រះ‌អម្ចាស់គួរជាទីទុកចិត្ត ធ្វើឱ្យមនុស្សល្ងិតល្ងង់បែរទៅជាមានប្រាជ្ញា។

ពាក្យអធិដ្ឋាន

បពិត្រព្រះយេស៊ូគ្រីស្តជាអម្ចាស់! នៅពេលថ្ងៃត្រង់នេះ ភាពងងឹតបានគ្របដណ្តប់ពេញផែនដីទាំងមូល ព្រះអង្គបានជាប់នៅលើឈើឆ្កាង ដូចជាជនរងគ្រោះដែលគ្មានកំហុស ដើម្បីរំដោះយើងខ្ញុំ។ សូមឱ្យពន្លឺរបស់ព្រះអង្គគង់នៅជាមួយយើងខ្ញុំ ដើម្បីណែនាំយើងខ្ញុំចូលទៅកាន់ជីវិតអស់កល្បជានិច្ច នៅក្នុងព្រះរាជ្យដែលព្រះអង្គគង់នៅ និងសោយរាជ្យអស់កល្បជាអង្វែងតរៀងទៅ។ អាម៉ែន!

ម៉ោង៣ រសៀល

ព្រះបន្ទូលរបស់ព្រះជាម្ចាស់ (៣ រសៀល) អភ ២,៨-៩

ព្រះអង្គសង្គ្រោះបងប្អូន មកពីព្រះអង្គមានព្រះហឫទ័យប្រណីសន្តោស ដោយសារបងប្អូនមានជំនឿ។ ការសង្គ្រោះមិនមែនមកពីបងប្អូនទេ គឺជាព្រះអំណោយទានរបស់ព្រះជាម្ចាស់ ហើយក៏មិនមែនមកពីមនុស្សប្រព្រឹត្តអំពើល្អដែរ ដើម្បីកុំឱ្យនរណាម្នាក់អួតខ្លួនបាន។

បន្ទរ៖ មនុស្សនៅលើផែនដីនឹងស្គាល់មាគ៌ារបស់ព្រះ‌អង្គ។
—ហើយក្នុងចំណោមប្រជា‌ជាតិទាំងឡាយ គេនឹងស្គាល់ការសង្គ្រោះរបស់ព្រះ‌អង្គ!។

ពាក្យអធិដ្ឋាន

បពិត្រព្រះយេស៊ូគ្រីស្តជាអម្ចាស់ ! ព្រះអង្គបាននាំចោរដែលកែប្រែចិត្តគំនិត ចេញពីការរងទុក្ខនៅលើឈើឆ្កាង ទៅកាន់អំណរសប្បាយនៃព្រះរាជ្យរបស់ព្រះអង្គ។ បពិត្រព្រះអម្ចាស់! នៅពេលយើងខ្ញុំទទួលមរណភាព សូមឱ្យយើងខ្ញុំដែលសារភាពអំពើបាបរបស់ខ្លួនមកឯព្រះអង្គ តាមរយៈទ្វារនៃស្ថានបរមសុខ ដើម្បីឱ្យយើងខ្ញុំមានអំណរសប្បាយអស់កល្បជានិច្ច នៅក្នុងព្រះរាជ្យដែលព្រះអង្គគង់នៅ និងសោយរាជ្យអស់កល្បជាអង្វែងតរៀងទៅ។ អាម៉ែន!

សូមកោតសរសើរព្រះអម្ចាស់!
សូមអរព្រះគុណព្រះអម្ចាស់!

59 Views

Post Views: 60