បុណ្យព្រះយេស៊ូសម្តែងព្រះអង្គ (ពេលល្ងាចទី១)

Posted on 5 ខែមករា 20253 ខែមករា 2025 by Siya Khim

បុណ្យព្រះយេស៊ូសម្តែងព្រះអង្គ

(បុណ្យឱឡារិក)

(ពេលល្ងាចទី១)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១៣៥

បន្ទរទី១៖ នៅមុនពេលថ្ងៃរះ ឬពេលវេលាចាប់ផ្តើម ព្រះបុត្រាដ៏ជាទីស្រឡាញ់របស់ព្រះបិតា ជាព្រះអម្ចាស់សង្រ្គោះនៃយើង បានបង្ហាញរូបរាងនៅលើផែនដីក្នុងថ្ងៃនេះ។

(ក)

^១	ហាលេលូយ៉ា! ចូរសរសើរតម្កើងព្រះ‌នាមព្រះ‌អម្ចាស់! អ្នកបម្រើរបស់ព្រះ‌អម្ចាស់អើយ ចូរនាំគ្នាសរសើរតម្កើងព្រះ‌អង្គ!
^២	អ្នករាល់គ្នាដែលស្ថិតនៅក្នុងព្រះ‌ដំណាក់របស់ព្រះ‌អម្ចាស់ អ្នករាល់គ្នាដែលស្ថិតនៅក្នុងបរិវេណព្រះ‌ដំណាក់របស់ព្រះនៃយើងអើយ
^៣	ចូរនាំគ្នាសរសើរតម្កើងព្រះ‌អម្ចាស់ ដ្បិតព្រះ‌អង្គមានព្រះ‌ហឫទ័យសប្បុរស ចូរស្មូតទំនុក‌តម្កើងថ្វាយព្រះ‌នាមព្រះ‌អង្គ ដ្បិតព្រះ‌អង្គគាប់ព្រះ‌ហឫទ័យនឹងយើង។
^៤	ព្រះ‌អម្ចាស់បានជ្រើស‌រើសពូជ‌ពង្សលោកយ៉ាកុប ហើយព្រះអង្គយកជនជាតិអ៊ីស្រាអែលធ្វើជាប្រជាជនផ្ទាល់របស់ព្រះ‌អង្គ។
^៥	ខ្ញុំដឹងច្បាស់ថា ព្រះ‌អម្ចាស់ជាព្រះដ៏ឧត្តុង្គ‌ឧត្ដម ព្រះ‌អម្ចាស់របស់យើង ព្រះ‌អង្គប្រសើរលើសព្រះទាំងប៉ុន្មាន។
^៦	បើព្រះអម្ចាស់សព្វព្រះ‌ហឫទ័យធ្វើការអ្វី ព្រះ‌អង្គនឹងសម្រេចការនោះនៅលើផ្ទៃមេឃ និងផែន‌ដី នៅក្នុងសមុទ្រ និងនៅក្នុងទីជម្រៅនៃបាតសមុទ្រ។
^៧	ព្រះអង្គនាំពពកចេញពីជើងមេឃ ព្រះ‌អង្គធ្វើឲ្យមានផ្លេកបន្ទោរ ដើម្បីឲ្យភ្លៀងធ្លាក់ ហើយព្រះ‌អង្គក៏បានបញ្ចេញខ្យល់ឲ្យបក់បោកមកដែរ។
^៨	ព្រះអង្គបានប្រហារកូនច្បងទាំង‌ឡាយនៅស្រុកអេស៊ីប គឺចាប់តាំងពីមនុស្ស រហូតដល់សត្វពាហនៈ។
^៩	ព្រះអង្គសម្ដែងទីសម្គាល់ និងឫទ្ធិ‌បាដិ‌ហារិយ៍ផ្សេងៗនៅស្រុកអេស៊ីប ដើម្បីដាក់ទោសព្រះ‌ចៅផារ៉ោន និងមន្ត្រីទាំងប៉ុន្មានរបស់ស្តេច។
^១០	ព្រះអង្គបានវាយប្រហារប្រជាជាតិជាច្រើន ព្រះ‌អង្គបានប្រហារជីវិតស្តេចដ៏ខ្លាំងពូកែ
^១១	គឺព្រះបាទស៊ីហុន ជាស្តេចស្រុកអាម៉ូរី ព្រះ‌បាទអុកជាស្តេចស្រុកបាសាន និងស្តេចទាំងប៉ុន្មានរបស់ជនជាតិកាណាន
^១២	ហើយព្រះអង្គប្រគល់ទឹកដីរបស់ពួកគេ ឲ្យអ៊ីស្រាអែលជាប្រជារាស្ត្ររបស់ព្រះ‌អង្គទុកជាមត៌ក។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ នៅមុនពេលថ្ងៃរះ ឬពេលវេលាចាប់ផ្តើម ព្រះបុត្រាដ៏ជាទីស្រឡាញ់របស់ព្រះបិតា ជាព្រះអម្ចាស់សង្រ្គោះនៃយើង បានបង្ហាញរូបរាងនៅលើផែនដីក្នុងថ្ងៃនេះ។

បន្ទរទី២៖ ព្រះ‌អម្ចាស់ជាព្រះដ៏ឧត្តុង្គ‌ឧត្ដម ព្រះ‌អង្គប្រសើរលើសព្រះទាំងប៉ុន្មាន។

(ខ)

(បទកាកគតិ)

^១៣-	បពិត្រព្រះម្ចាស់	ព្រះនាមរបស់	ព្រះអង្គគង់វង្ស
	ជារៀងរហូត	ល្បីល្បាញយូរលង់	ត្រចះត្រចង់
		អស់កល្បគ្រប់គ្រា	។
^១៤-	ដ្បិតព្រះអង្គរក	យុត្តិធម៌នាំមក	ឲ្យរាស្រ្តប្រជា
	ព្រះអង្គអាណិត	អាសូរគ្រប់គ្នា	អស់កូនចៅជា
		អ្នកស្ម័គ្របម្រើ	។
^១៥-	ព្រះផ្សេងឯទៀត	ជាព្រះមិនពិត	កើតពីមនុស្សធ្វើ
	ពីមាសពីប្រាក់	ពីស្ពាន់ពីឈើ	អ្វីសព្វសារពើ
		ជាព្រះក្លែងក្លាយ	។
^១៦-	ព្រះនោះមានមាត់	បើកបិទមិនកើត	មិនអាចនិយាយ
	មាត់ដែលជាងឆ្លាក់	គេដាក់មកឲ្យ	ភ្នែកដែលមានហើយ
		តែបើកមិនរួច	។
^១៧-	ត្រចៀកក៏មាន	តែស្តាប់មិនបាន	ដូចត្រចៀកខូច
	ស្រេចតែជាងធ្វើ	តាមធំតាមតូច	ខ្យល់ចូលមិនរួច
		ដង្ហើមក៏គ្មាន	។
^១៨-	សូមឲ្យអស់អ្នក	ដែលខំសូនឆ្លាក់	ឥតមានស្រាកស្រាន្ត
	ធ្វើព្រះក្លែងក្លាយ	មានទាំងប៉ុន្មាន	ឲ្យពួកគេបាន
		ដូចព្រះទាំងនោះ	។
^១៩-	អ៊ីស្រាអែលអើយ	កុំនៅកន្តើយ	នាំគ្នាទាំងអស់
	ខំលើកតម្កើង	ព្រះជាអម្ចាស់	ទាំងពូជរបស់
		លោកអរ៉ុនផង	។
^២០-	គ្រួសារលេវី	ចូរមកមូលមីរ	សរសើរផ្គូផ្គង
	និងអ្នកដែលធ្លាប់	គោរពព្រះអង្គ	សរសើរថ្កើងថ្កាន
		ព្រះម្ចាស់នៃយើង	។
^២១-	ចូរយើងនាំគ្នា	គ្រប់ៗអង្គា	មូលផ្តុំតម្កើង
	ព្រះជាអម្ចាស់	គង់ភ្នំស៊ីយ៉ូន	និងនៅក្នុងក្រុង
		យេរូសាឡឹម	។
	សូមកោតសរសើរ	ដល់ព្រះបិតា	ព្រះរាជបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កានឥតហ្មង
		ដែលគង់ជានិច្ច	។

បន្ទរ ៖ ព្រះ‌អម្ចាស់ជាព្រះដ៏ឧត្តុង្គ‌ឧត្ដម ព្រះ‌អង្គប្រសើរលើសព្រះទាំងប៉ុន្មាន។

បទលើកតម្កើងតាមលិខិតផ្ញើជូនលោកធីម៉ូថេ (១ធម ៣,១៦)

គម្រោង‌ការដ៏លាក់កំបាំង និងសិរីរុងរឿងរបស់ព្រះគ្រីស្ត

បន្ទរទី៣ ៖ ពន្លឺផ្កាយរះឡើងប្រៀបដូចជាអណ្តាតភ្លើងឆេះឡើង ដែលចង្អុលបង្ហាញផ្លូវទៅកាន់ព្រះជាម្ចាស់ ជាព្រះមហាក្សត្រលើមហាក្សត្រនានា។ ពួកហោរាចារ្យបានឃើញទីសម្គាល់ ហើយនាំយកដង្វាយរបស់ពួកគេទៅថ្វាយព្រះមហាក្សត្រដ៏ប្រសើរឧត្តម នៅផ្ទះដែលព្រះអង្គគង់ស្នាក់។

^១៦	ព្រះគ្រីស្តយាងមកមានឋានៈជាមនុស្ស ព្រះអង្គសុចរិតដោយ‌សារព្រះ‌វិញ្ញាណ ព្រះ‌អង្គបានបង្ហាញខ្លួនឲ្យពួកទេវទូតឃើញ គេបានប្រកាសអំពីព្រះ‌អង្គនៅក្នុងចំណោមជាតិសាសន៍នានា គេបានជឿលើព្រះ‌អង្គក្នុងពិភព‌លោក ព្រះ‌ជាម្ចាស់បានលើកព្រះ‌អង្គឡើងឲ្យមានសិរី‌រុងរឿង។

បន្ទរ ៖ ពន្លឺផ្កាយរះឡើងប្រៀបដូចជាអណ្តាតភ្លើងឆេះឡើង ដែលចង្អុលបង្ហាញផ្លូវទៅកាន់ព្រះជាម្ចាស់ ជាព្រះមហាក្សត្រលើមហាក្សត្រនានា។ ពួកហោរាចារ្យបានឃើញទីសម្គាល់ ហើយនាំយកដង្វាយរបស់ពួកគេទៅថ្វាយព្រះមហាក្សត្រដ៏ប្រសើរឧត្តម នៅផ្ទះដែលព្រះអង្គគង់ស្នាក់។

ព្រះបន្ទូលរបស់ព្រះជាម្ចាស់ (២ធម ១,៩-១0)

ព្រះ‌អង្គហ្នឹងហើយ ដែលបានសង្គ្រោះយើង និងបានត្រាស់ហៅយើងឲ្យមកធ្វើជាប្រជា‌រាស្ដ្រដ៏‌វិសុទ្ធរបស់ព្រះ‌អង្គ។ ព្រះ‌អង្គត្រាស់ហៅយើងដូច្នេះ មិនមែនមកពីអំពើដែលយើងបានប្រព្រឹត្តនោះទេ គឺស្របតាមគម្រោង‌ការ និងស្របតាមព្រះ‌ហឫទ័យប្រណី‌សន្ដោស ដែលព្រះ‌អង្គបានប្រទានមកយើង ក្នុងអង្គព្រះ‌គ្រីស្ត‌យេស៊ូ តាំងពីមុនកាលសម័យទាំងអស់មកម៉្លេះ។ ឥឡូវនេះ ព្រះ‌អង្គបានសម្ដែងឲ្យយើងស្គាល់ព្រះ‌ហឫទ័យប្រណី‌សន្ដោសរបស់ព្រះ‌អង្គ ដោយព្រះ‌គ្រីស្ត‌យេស៊ូជាព្រះ‌សង្គ្រោះរបស់យើងយាងមកក្នុងលោកនេះ។ ព្រះ‌គ្រីស្តបានបំបាត់អំណាចនៃសេចក្ដីស្លាប់ ព្រមទាំងបំភ្លឺយើងឲ្យស្គាល់ជីវិតអមតៈ ដោយ‌សារដំណឹង‌ល្អ។

បន្ទរ៖ ប្រជាជនទាំងឡាយ ទាំងបុរស ទាំងស្រ្តី និងគ្រប់សញ្ជាតិ នឹងបាន ទទួលពរដោយសារព្រះអង្គ។ បន្ទរឡើងវិញ៖…
—ប្រជា‌ជាតិនានា នឹងនាំគ្នាថ្លែងពីសិរី‌រុងរឿងរបស់ព្រះ‌អម្ចាស់។ បន្ទរ៖ *…
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ នៅពេលឃើញផ្កាយ ពួកហោរាចារ្យបាននិយាយគ្នាថា៖ ផ្កាយនេះច្បាស់ជាទីសម្គាល់នៃកំណើតរបស់ព្រះមហាក្សត្រដ៏ប្រសើរឧត្តមណាមួយហើយ។ ចូរយើងនាំគ្នាទៅស្វែងរកព្រះអង្គ ហើយនាំយកដង្វាយមាស គ្រឿងក្រអូប និងជ័រល្វីងទេស ទៅថ្វាយព្រះអង្គផង។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ នៅពេលឃើញផ្កាយ ពួកហោរាចារ្យបាននិយាយគ្នាថា៖ ផ្កាយនេះច្បាស់ជាទីសម្គាល់នៃកំណើតរបស់ព្រះមហាក្សត្រដ៏ប្រសើរឧត្តមណាមួយហើយ។ ចូរយើងនាំគ្នាទៅស្វែងរកព្រះអង្គ ហើយនាំយកដង្វាយមាស គ្រឿងក្រអូប និងជ័រល្វីងទេស ទៅថ្វាយព្រះអង្គផង។

ពាក្យអង្វរសកល

នៅថ្ងៃនេះ ពួកហោរាចារ្យបានមកថ្វាយបង្គំព្រះសង្រ្គោះរបស់យើង។ ចូរយើងនាំគ្នាក្រាបថ្វាយបង្គំព្រះអង្គយ៉ាងសប្បាយរីករាយ ដោយទូលថា ៖

បន្ទរ៖ ឱព្រះអម្ចាស់អើយ ! សូមសង្រ្គោះជនក្រីក្រកំសត់ទុគ៌តផង !

ឱព្រះមហាក្សត្រនៃប្រជាជាតិទាំងឡាយអើយ ! ព្រះអង្គបានត្រាស់ហៅពួកហោរាចារ្យឱ្យមកក្រាបថ្វាយបង្គំព្រះអង្គ ប្រៀបដូចជាតំណាងរបស់ប្រជាជាតិនានា មុនគេបង្អស់
—សូមព្រះអង្គប្រោសប្រទានឱ្យយើងខ្ញុំមានវិញ្ញាណនៃការគោរពប្រណិប័តន៍ និងបម្រើព្រះអង្គផង។ (បន្ទរ)

ឱព្រះមហាក្សត្រនៃសិរីរុងរឿងអើយ ! ព្រះអង្គវិនិច្ឆ័យទោសប្រជារាស្រ្ត របស់ព្រះអង្គ ដោយយុត្តិធម៌
—សូមព្រះអង្គប្រទានឱ្យមនុស្សលោកមានសេចក្តីសុខសាន្តយ៉ាងបរិបូណ៍ផង។ (បន្ទរ)

ឱព្រះមហាក្សត្រនៃយុគសម័យ ! ព្រះអង្គបានអត់ធ្មត់ពីជំនាន់មួយទៅជំនាន់មួយ
—សូមផ្ញើព្រះបន្ទូលព្រះអង្គមកក្នុងដួងចិត្តរបស់យើងខ្ញុំ ប្រៀបដូចជាភ្លៀងធ្លាក់នៅនិទាឃរដូវ។ (បន្ទរ)

ឱព្រះមហាក្សត្រនៃយុត្តិធម៌ ! ព្រះអង្គសព្វព្រះហឫទ័យដោះលែងជនក្រខ្សត់ដែលគ្មានមេធាវីការពារ ឱ្យមានសេរីភាព
—សូមព្រះអង្គអាណិតអាសូរដល់អ្នកដែលមានទុក្ខព្រួយ និងសោកសៅផង។ (បន្ទរ)

បពិត្រព្រះអម្ចាស់ ! មនុស្សគ្រប់ជំនាន់កោតសរសើរព្រះនាមព្រះអង្គ
—សូមសម្តែងឫទ្ធិចេស្តាដ៏អស្ចារ្យរបស់ព្រះអង្គ ឱ្យបងប្អូនយើងខ្ញុំដែលបានទទួលមរណភាពទៅហើយផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះជាម្ចាស់អើយ ! ព្រះអង្គចាត់ព្រះបុត្រាឲ្យយាងមកបំភ្លឺមនុស្សគ្រប់ជាតិគ្រប់សាសន៍ ដើម្បីស្គាល់ព្រះអង្គ និងឲ្យស្គាល់ពីតម្លៃដ៏ខ្ពង់ខ្ពស់នៃជីវិតរបស់ខ្លួន។ សូមព្រះអង្គមេត្តាបំភ្លឺចិត្តគំនិតរបស់យើងខ្ញុំ ឲ្យខិតខំស្វែងរកសេចក្តីពិត និងពង្រឹងជំនឿរបស់យើងខ្ញុំជានិច្ច។

យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

75 Views

Post Views: 75