បុណ្យគោរពសន្តបុគ្គលទាំងឡាយ

Posted on 31 ខែតុលា 202511 ខែកក្កដា 2025 by Siya Khim

រដូវធម្មតា អាទិត្យទី៣០

បុណ្យគោរពសន្តបុគ្គលទាំងឡាយ

(បុណ្យឱឡារិក)

_{(ពេលល្ងាចទី១)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១១៣

បន្ទរទី១៖ ឱព្រះអម្ចាស់អើយ ! ពន្លឺដែលគង់នៅអស់កល្បជានិច្ច នឹងរះបំភ្លឺមកលើសន្តបុគ្គលទាំងឡាយរបស់ព្រះអង្គ ហើយពួកគេនឹងរស់នៅអស់កល្បជាអង្វែងតរៀងទៅ អាលេលូយ៉ា!

^១	ចូរសរសើរតម្កើងព្រះអម្ចាស់! អ្នកបម្រើរបស់ព្រះ‌អម្ចាស់អើយ ចូរនាំគ្នាសរសើរតម្កើងព្រះអង្គ! ចូរនាំគ្នាសរសើរតម្កើងព្រះ‌នាមព្រះ‌អម្ចាស់!
^២	ចូរលើកតម្កើងព្រះ‌នាមព្រះ‌អម្ចាស់តាំងពីពេលនេះរហូតតទៅ!
^៣	តាំងពីពេលថ្ងៃរះ រហូតទល់ថ្ងៃលិច ចូរសរសើរតម្កើងព្រះ‌នាមរបស់ព្រះ‌អម្ចាស់!
^៤	ព្រះ‌អម្ចាស់គង់នៅពីលើប្រជា‌ជាតិទាំង‌ឡាយ សិរី‌រុងរឿងរបស់ព្រះ‌អង្គខ្ពស់ជាងផ្ទៃមេឃទៅទៀត។
^៥	តើមាននរណាអាចផ្ទឹមស្មើនឹងព្រះអម្ចាស់ជាព្រះរបស់យើងបាន? ព្រះ‌អង្គគង់នៅលើស្ថានដ៏ខ្ពស់បំផុត
^៦	ព្រះ‌អង្គទតមើលមកផ្ទៃមេឃ និងផែន‌ដី ដែលនៅខាងក្រោមព្រះ‌អង្គ។
^៧	ព្រះ‌អង្គលើកមនុស្សទន់ខ្សោយឡើងពីធូលីដី ព្រះ‌អង្គលើកមនុស្សទុរគតឡើងពីភក់ជ្រាំ
^៨	ដើម្បីឱ្យគេកាន់កាប់អំណាចរួមជាមួយពួកអ្នកធំ គឺរួមជាមួយពួកអ្នកធំនៅក្នុងចំណោមប្រជា‌រាស្ដ្ររបស់ព្រះ‌អង្គ។
^៩	ព្រះ‌អង្គប្រទានឱ្យស្ត្រីអារមានកូន ឱ្យនាងរស់នៅក្នុងផ្ទះយ៉ាងសប្បាយជាមួយកូនៗរបស់នាង។ អាលេលូយ៉ា!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ ឱព្រះអម្ចាស់អើយ ! ពន្លឺដែលគង់នៅអស់កល្បជានិច្ច នឹងរះបំភ្លឺមកលើសន្តបុគ្គលទាំងឡាយរបស់ព្រះអង្គ ហើយពួកគេនឹងរស់នៅអស់កល្បជាអង្វែងតរៀងទៅ អាលេលូយ៉ា!

ទំនុកតម្កើងលេខ ១៤៧,១២-២០

បន្ទរទី២៖ យេរូសាឡឹមជាទីក្រុងរបស់ព្រះជាម្ចាស់ អ្នកនឹងរីករាយដោយសារកូនៗរបស់អ្នក ដ្បិតពួកគេនឹងបានទទួលពរ ហើយមកជួបជុំគ្នានៅជាមួយព្រះអម្ចាស់ អាលេលូយ៉ា!

(បទព្រហ្មគីតិ)

^១២-	ក្រុងយេរូសាឡឹម	កុំស្ងាត់ស្ងៀមនៅរេរង់
	ព្រមទាំងក្រុងស៊ីយ៉ូន	ចូរត្រៀមខ្លួនថ្កើងព្រះម្ចាស់	។
^១៣-	ដ្បិតព្រះអង្គការពារ	អ្នករាល់គ្នាបានសុខណាស់
	ទ្រង់ឱ្យពរដល់រាស្រ្ត	ដែលរស់ពាសពេញទីក្រុង	។
^១៤-	ទ្រង់ប្រទានទឹកដី	មានសេរីសុខត្រចង់
	សន្តិភាពគ្រប់ជ្រុង	ស្រូវបម្រុងច្រើនមហិមា	។
^១៥-	នៅលើផ្ទៃផែនដី	ស្រស់ប្រិមប្រីយ៍ទ្រង់បញ្ជា
	ផ្សព្វផ្សាយគ្រប់ទិសា	ពីបញ្ជាព្រះអម្ចាស់	។
^១៦-	ព្រះអង្គឱ្យទឹកកក	ធ្លាក់ចុះមកច្រើនដេរដាស
	សន្សើមត្រជាក់ណាស់	ក៏ធ្លាក់ចុះតាមបញ្ជា	។
^១៧-	ព្រះអង្គធ្វើឱ្យព្រឹល	ធ្លាក់មិនខ្ជិលច្រើនមហិមា
	ឱ្យមានធាតុរងា	តើនរណាអាចទ្រាំបាន?	។
^១៨-	ពេលទ្រង់មានបន្ទូល	ធ្វើឱ្យព្រឹលទាំងប៉ុន្មាន
	ទឹកកកគ្រប់ទីស្ថាន	រលាយបានជាទឹកអស់	។
	ធ្វើឱ្យមានទាំងខ្យល់	បោកវិលវល់មិនឈប់សោះ
	បក់យកទឹកទាំងនោះ	ហូរតាមជ្រោះទៅមិនសល់	។
^១៩-	ទ្រង់សម្តែងឱ្យពូជ	លោកយ៉ាកុបស្តាប់បន្ទូល
	ក្រឹត្យវិន័យនិមល	ឱ្យអ៊ីស្រាអែលបានដឹង	។
^២០-	ព្រះអង្គពុំបញ្ជា	សព្វកិច្ចការអស់ទាំងហ្នឹង
	ឱ្យជាតិសាសន៍ផ្សេងដឹង	វិន័យទ្រង់នោះសោះឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ យេរូសាឡឹមជាទីក្រុងរបស់ព្រះជាម្ចាស់ អ្នកនឹងរីករាយដោយសារកូនៗរបស់អ្នក ដ្បិតពួកគេនឹងបានទទួលពរ ហើយមកជួបជុំគ្នានៅជាមួយព្រះអម្ចាស់ អាលេលូយ៉ា!

បទលើកតម្កើងតាមគម្ពីរវិវរណៈ (វវ ១៩,១-៧)

បន្ទរទី៣៖ នៅមុខបល្ល័ង្ករបស់ព្រះជាម្ចាស់ និងនៅមុខបល្ល័ង្កកូនចៀម សន្តបុគ្គលទាំងឡាយនឹងច្រៀងបទថ្មី ហើយសម្លេងរបស់ពួកគេនឹងឮខ្ទរខ្ទារពាសពេញផែនដី អាលេលូយ៉ា !

^១	បន្ទាប់ពីហេតុ‌ការណ៍ទាំងនោះមក ខ្ញុំឮហាក់ដូចជា មានសំឡេងយ៉ាងខ្លាំងរបស់មហាជនច្រើនកុះករនៅលើមេឃថា៖ «ហាលេលូយ៉ា! សូមលើកតម្កើងព្រះ‌ជាម្ចាស់នៃយើង ព្រះ‌អង្គសង្គ្រោះយើង ព្រះ‌អង្គប្រកបដោយសិរី‌រុងរឿង និងឫទ្ធា‌នុភាព
^២	ដ្បិតព្រះ‌អង្គវិនិច្ឆ័យទោសយ៉ាងត្រឹមត្រូវ តាមយុត្តិធម៌។ ព្រះ‌អង្គបានវិនិច្ឆ័យទោសស្ត្រីពេស្យាដ៏មានឈ្មោះល្បី ដែលបានធ្វើឱ្យផែន‌ដីទៅជាសៅ‌ហ្មង ដោយកាម‌គុណរបស់នាង ព្រះអង្គបានដាក់ទោសស្ត្រីពេស្យានោះ ព្រោះនាងបានបង្ហូរឈាមពួកអ្នកបម្រើរបស់ព្រះ‌អង្គ»។
^៣	មហា‌ជនទាំងនោះពោលម្ដងទៀតថា៖ «ហាលេលូយ៉ា! ផ្សែងនៃក្រុងនោះនឹងហុយឡើងអស់‌កល្បជាអង្វែងតរៀងទៅ»។
^៤	ពួកព្រឹទ្ធាចារ្យទាំងម្ភៃបួនរូប និងសត្វមានជីវិតទាំងបួន ក៏នាំគ្នាក្រាបចុះ ហើយថ្វាយ‌បង្គំព្រះជាម្ចាស់ដែលគង់នៅលើបល្ល័ង្ក ទាំងពោលថា៖ «អាម៉ែន! ហាលេលូយ៉ា!»។
^៥	មានសំឡេងចេញពីបល្ល័ង្កមកថា៖ «អ្នករាល់គ្នាជាអ្នកបម្រើព្រះ‌ជាម្ចាស់ អ្នករាល់គ្នាជាអ្នកគោរពកោតខ្លាចព្រះ‌អង្គទាំងតូចទាំងធំអើយ ចូរសរសើរតម្កើងព្រះ‌ជាម្ចាស់នៃយើង!»។
^៦	ពេលនោះ ខ្ញុំឮហាក់ដូចជាមានសំឡេងបណ្ដា‌ជនដ៏ច្រើនកុះ‌ករ ដូចជាមានស្នូរសន្ធឹកមហាសាគរ និងដូចជាមានស្នូរផ្គរ‌លាន់យ៉ាងខ្លាំងថា៖ «ហាលេលូយ៉ា! ដ្បិតព្រះ‌ជា‌អម្ចាស់ជាព្រះដ៏មានព្រះ‌ចេស្ដាលើអ្វីៗទាំងអស់ ព្រះ‌អង្គបានតាំងព្រះ‌រាជ្យរបស់ព្រះ‌អង្គហើយ
^៧	យើងនាំគ្នាអរសប្បាយឡើង ត្រូវមានអំណររីក‌រាយឱ្យខ្លាំង ហើយនាំគ្នាលើកតម្កើងសិរី‌រុងរឿងព្រះ‌អង្គ ដ្បិតដល់ពេលរៀបវិវាហ‌មង្គល‌ការកូនចៀមហើយ ភរិយាថ្មោងថ្មីរបស់កូនចៀមក៏បានរៀបចំខ្លួនរួចជាស្រេចហើយដែរ។

បន្ទរ៖ នៅមុខបល្ល័ង្ករបស់ព្រះជាម្ចាស់ និងនៅមុខបល្ល័ង្កកូនចៀម សន្តបុគ្គលទាំងឡាយនឹងច្រៀងបទថ្មី ហើយសម្លេងរបស់ពួកគេនឹងឮខ្ទរខ្ទារពាសពេញផែនដី អាលេលូយ៉ា !

ព្រះបន្ទូលរបស់ព្រះជាម្ចាស់ (ហប ១២,២២-២៤)

បង‌ប្អូនចូលមកជិតភ្នំស៊ីយ៉ូន មកជិតក្រុងរបស់ព្រះដ៏មានព្រះ‌ជន្មរស់ គឺក្រុងយេរូ‌សាឡឹមនៅស្ថានបរមសុខ ដែលមានទេវទូតរាប់លានរាប់កោដិ និងមានព្រះ‌សហគមន៍របស់ពួករៀម‌ច្បង ដែលមានឈ្មោះកត់ទុកនៅស្ថានបរម‌សុខ កំពុងជួបជុំគ្នាយ៉ាងអធិកអធម។ បង‌ប្អូនចូលមកជិតព្រះ‌ជាម្ចាស់ ដែលវិនិច្ឆ័យមនុស្សទាំងអស់ និងចូលមកជិតវិញ្ញាណ‌ក្ខ័ន្ធអ្នកសុចរិតដែលបានគ្រប់លក្ខណៈ បង‌ប្អូនចូលមកជិតព្រះ‌យេស៊ូ ដែលជាស្ពាននៃសម្ពន្ធ‌មេត្រីថ្មី ហើយចូលមកជិតព្រះ‌លោហិតសម្រាប់ប្រោះ គឺជាព្រះ‌លោហិតដែលទូល‌អង្វរ ប្រសើរជាងលោហិតរបស់លោកអេបិលទៅទៀត។

បន្ទរ៖ មនុស្សសុចរិតនឹងរីករាយសប្បាយ *នៅចំពោះព្រះភក្រ្តព្រះអម្ចាស់។ បន្ទរឡើងវិញ៖…
-ពួកគេនឹងច្រៀងយ៉ាងសប្បាយ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ គឺព្រះអង្គហើយដែលក្រុមគ្រីស្តទូតលើកតម្កើង ! គឺព្រះអង្គហើយ ដែលពួកព្យាការីច្រៀងកោតសរសើរ គឺព្រះអង្គហើយដែលមរណសាក្សីទាំងឡាយផ្តល់សក្ខីភាព ដោយបានបូជាជីវិតថ្វាយព្រះអង្គ។ សន្តបុគ្គលទាំងឡាយច្រៀងកោតសរសើរសិរីរុងរឿងរបស់ព្រះអង្គថា ៖ ឱព្រះត្រៃឯក ! ជាព្រះជាម្ចាស់តែមួយដ៏វិសុទ្ធ។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ គឺព្រះអង្គហើយដែលក្រុមគ្រីស្តទូតលើកតម្កើង ! គឺព្រះអង្គហើយ ដែលពួកព្យាការីច្រៀងកោតសរសើរ គឺព្រះអង្គហើយដែលមរណសាក្សីទាំងឡាយផ្តល់សក្ខីភាព ដោយបានបូជាជីវិតថ្វាយព្រះអង្គ។ សន្តបុគ្គលទាំងឡាយច្រៀងកោតសរសើរសិរីរុងរឿងរបស់ព្រះអង្គថា ៖ ឱព្រះត្រៃឯក ! ជាព្រះជាម្ចាស់តែមួយដ៏វិសុទ្ធ។

ពាក្យអង្វរសកល

ព្រះជាម្ចាស់ គឺជារង្វាន់នៃសន្តបុគ្គលទាំងឡាយ ចូរយើងទូលទៅព្រះអង្គ ដោយអំណរសប្បាយថា ៖

បន្ទរ៖ បពិត្រព្រះអម្ចាស់ ! សូមសង្រ្គោះប្រជារាស្រ្តរបស់ព្រះអង្គ !

ឱព្រះជាម្ចាស់អើយ ! តាមរយៈព្រះយេស៊ូគ្រីស្តជាព្រះបុត្រាព្រះអង្គ ទ្រង់បានកសាងព្រះសហគមន៍នៅលើគ្រឹះនៃក្រុមគ្រីស្តទូត
—សូមព្រះអង្គថែរក្សាការបង្រៀនរបស់ពួកគាត់ ឱ្យមានសុវត្ថិភាពក្នុងចំណោមប្រជារាស្រ្តរបស់ព្រះអង្គ។ (បន្ទរ)

ព្រះអង្គបានធ្វើឱ្យមរណសាក្សីមានអំណាចផ្តល់សក្ខីភាព ទោះបីជាពួកគេត្រូវបូជាជីវិតរបស់ខ្លួនក៏ដោយ
—សូមព្រះអង្គជួយឱ្យគ្រីស្តបរិស័ទទាំងអស់ហ៊ានផ្តល់សក្ខីភាពអំពីព្រះបុត្រាព្រះអង្គ ដោយចិត្តស្មោះត្រង់។ (បន្ទរ)

ព្រះអង្គបានប្រទានឱ្យនាងព្រហ្មចារិនីដ៏វិសុទ្ធ មានព្រះអំណោយទាននៃការយកតម្រាប់តាមព្រហ្មចរិយធម៌របស់ព្រះគ្រីស្ត
—សូមព្រះអង្គប្រោសឱ្យអស់អ្នកដែលថ្វាយខ្លួនទៅព្រះជាម្ចាស់ ឱ្យកាន់ព្រហ្មចរិយធម៌យ៉ាងខ្ជាប់ខ្ជួន ដើម្បីធ្វើជាបន្ទាល់នៃការយាងមកនៃព្រះរាជ្យរបស់ព្រះអង្គ។ (បន្ទរ)

ឥឡូវនេះ សន្តបុគ្គលរបស់ព្រះអង្គបានឃើញព្រះភក្ត្រព្រះអង្គផ្ទាល់នឹងភ្នែក
—សូមព្រះអង្គថែរក្សាសេចក្តីសង្ឃឹមដ៏រស់ក្នុងដួងចិត្តយើងខ្ញុំ ដែលរង់ចាំជួបព្រះភក្រ្តព្រះអង្គ នៅថ្ងៃចុងក្រោយបំផុត។ (បន្ទរ)

សូមព្រះអង្គនាំមរណបុគ្គលទាំងអស់ឱ្យចូលទៅស្ថានបរមសុខ រួមជាមួយព្រះនាងម៉ារី សន្តយ៉ូសែប និងសន្តបុគ្គលទាំងឡាយ
—ហើយសូមព្រះអង្គប្រទានឱ្យយើងខ្ញុំមានកន្លែងនៅក្នុងព្រះរាជ្យរបស់ព្រះអង្គផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះជាម្ចាស់ដ៏មានឫទ្ធានុភាពសព្វប្រការ និងមានព្រះជន្មគង់នៅជានិច្ច ! នៅថ្ងៃនេះ យើងខ្ញុំសូមគោរពដល់គុណធម៌របស់សន្តបុគ្គលទាំងឡាយដែលជាព្រះអំណោយទានរបស់ព្រះអង្គ។ តាមរយៈពាក្យទូលអង្វររបស់សន្តបុគ្គលទាំងឡាយ សូមព្រះអង្គប្រោសឱ្យយើងខ្ញុំបានរួចពីបាប និងបានគាប់ព្រះហឫទ័យព្រះអង្គ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្តជាព្រះបុត្រាព្រះអង្គ និងជាអម្ចាស់យើងខ្ញុំ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

33 Views

Post Views: 33