ថ្ងៃសុក្រពិសិដ្ឋ

Posted on 18 ខែមេសា 20255 ខែមីនា 2025 by Siya Khim

ត្រៃទិវានៃបុណ្យចម្លង

ថ្ងៃសុក្រពិសិដ្ឋ (ព្រះអម្ចាស់សោយទិវង្គត)
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១៦,១០-១៩

បន្ទរទី១ ៖ ប្រជាជនទាំងឡាយអើយ ! ចូរមើលមកយើង ចូរសម្លឹងមើលទុក្ខលំបាករបស់យើង។

^១០	ខ្ញុំនៅតែមានជំនឿដដែល ទោះបីខ្ញុំពោលថា ខ្ញុំជាមនុស្សវេទនា។
^១១	ពេលខ្ញុំមានភ័យអាសន្ន ខ្ញុំពោលឡើងថា យើងមិនអាចទុកចិត្តលើមនុស្សណាម្នាក់បានឡើយ។
^១២	តើខ្ញុំអាចយកអ្វីមកតបស្នងនឹងព្រះ‌គុណទាំងប៉ុន្មាន ដែលព្រះ‌អម្ចាស់បានសម្ដែងមកលើរូបខ្ញុំ?
^១៣	ខ្ញុំនឹងលើកពែងឡើងថ្វាយព្រះ‌អម្ចាស់ដែលបានរំដោះខ្ញុំ ខ្ញុំនឹងអង្វររកព្រះ‌នាមរបស់ព្រះ‌អម្ចាស់។
^១៤	ខ្ញុំនឹងយកតង្វាយមកថ្វាយព្រះ‌អម្ចាស់តាមពាក្យដែលខ្ញុំបានសន្យា នៅចំពោះមុខប្រជាជនទាំងមូលរបស់ព្រះ‌អង្គ។
^១៥	ព្រះ‌អម្ចាស់ព្រួយព្រះ‌ហឫទ័យណាស់ នៅពេលប្រជាជនដ៏‌វិសុទ្ធណាម្នាក់ស្លាប់។
^១៦	ឱព្រះ‌អម្ចាស់អើយ ទូល‌បង្គំជាអ្នកបម្រើរបស់ព្រះ‌អង្គ ដូចម្ដាយរបស់ទូល‌បង្គំដែរ ព្រះ‌អង្គបានរំដោះទូល‌បង្គំឲ្យរួចពីស្លាប់។
^១៧	ទូលបង្គំសូមថ្វាយយញ្ញបូជា ដើម្បីអរព្រះ‌គុណព្រះ‌អង្គ ខ្ញុំនឹងអង្វររកព្រះ‌នាមរបស់ព្រះ‌អម្ចាស់។
^១៨	ខ្ញុំនឹងយកតង្វាយមកថ្វាយព្រះ‌អម្ចាស់តាមពាក្យដែលខ្ញុំបានសន្យា នៅចំពោះមុខប្រជាជនទាំងមូលរបស់ព្រះ‌អង្គ
^១៩	គឺនៅក្នុងព្រះ‌វិហាររបស់ព្រះ‌អម្ចាស់ ដែលស្ថិតនៅកណ្ដាលក្រុងយេរូ‌សាឡឹម។ អាលេ‌លូយ៉ា!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ប្រជាជនទាំងឡាយអើយ ! ចូរមើលមកយើង ចូរសម្លឹងមើលទុក្ខលំបាករបស់យើង។

ទំនុកតម្កើងលេខ ១៤៣(១៤២),១-១១

បន្ទរទី២៖ ខ្ញុំឈឺចុកចាប់ក្នុងឱរា ចិត្តខ្ញុំប្រេះ‌ឆាពន់ប្រមាណ។

(បទពាក្យ៧)

^១-	ឱព្រះម្ចាស់អើយសូមសណ្តាប់	ពាក្យខ្ញុំរ៉ាយរ៉ាប់ទូលអង្វរ
	ផ្ទៀងព្រះកាណ៌ស្តាប់កុំឈប់ឈរ	សូមឆ្លើយតបតដោយប្រណី	។
^២-	សូមកុំចាប់ទោសយកកំហុស	អ្នកបម្រើស្មោះទៅកាត់ក្តី
	ដ្បិតគ្មានជនសុចរិតប្រពៃ	ចំពោះភក្ត្រព្រះអង្គឡើយ	។
^៣-	ពួកខ្មាំងសត្រូវតាមយាយី	ពីគ្រប់ទិសទីមិនកន្តើយ
	ឃុំខ្ញុំក្នុងទីងងឹតហើយ	ដូចអ្នកក្សិណក្ស័យយូរណាស់ណា	។
^៤-	ខ្ញុំបាក់ធ្លុះធ្លាក់អស់ទឹកចិត្ត	ទាល់ទាំងគំនិតក្នុងកាយា
	ថយទាំងកម្លាំងខ្វះប្រាជ្ញា	មិនដឹងគិតថាត្រូវធ្វើម៉េច?	។
^៥-	ខ្ញុំនឹកទៅដល់ជំនាន់មុន	សញ្ជឹងគូរគន់គ្រប់ភារកិច្ច
	ជាស្នាព្រះហស្តល្អបណ្តាច់	ឥតមានកលល្បិចគ្មានទើសទាល់	។
^៦-	ដៃខ្ញុំអង្វរខ្លួនបែរក្រាប	ដាក់កាយឲ្យទាបមុខព្រះម្ចាស់
	ដូចដីហួតហែងបែកប្រេះអស់	ស្ងួតរីងរាំងខ្សោះព្រោះគ្មានទឹក	។
^៧-	ឱព្រះជាអម្ចាស់ខ្ញុំអើយ	សូមជួយតបឆ្លើយឲ្យញយញឹក
	ខ្ញុំបាត់បង់អស់ធ្លាក់ទឹកចិត្ត	កុំលាក់បាំងបិទភក្ត្រនឹងខ្ញុំ	។
	ព្រោះតែខ្ញុំដូចជាមនុស្ស	ដែលធ្លាក់ក្នុងជ្រោះជ្រៅសន្លឹម
	គ្មាននរណាជួយអស់សង្ឃឹម	ដូចមេឃរលឹមគ្មានរស្មី	។
^៨-	សូមទ្រង់បង្ហាញធម៌មេត្តា	សន្តោសករុណាត្រាប្រណី
	ខ្ញុំផ្ញើរូបកាយជីវិតក្តី	លើព្រះម្ចាស់ថ្លៃរួចទៅហើយ	។
	សូមប្រោសប្រទានឲ្យខ្ញុំស្គាល់	មាគ៌ានិមលកុំកន្តើយ
	ដ្បិតទូលបង្គំផ្ចង់ចិត្តហើយ	ព្រះជាម្ចាស់អើយមិនបោះបង់	។
^៩-	ឱព្រះអម្ចាស់សូមរំដោះ	ខ្ញុំឲ្យផុតគ្រោះផុតពីខ្មាំង
	សត្រូវយាយីតាមប្រឆាំង	ខ្ញុំសូមព្រះអង្គពួនជ្រកផង	។
^១០-	សូមជួយបង្ហាត់ពត់បង្រៀន	ខ្ញុំព្រមតាមបានព្រះបំណង
	ដ្បិតទ្រង់ជាព្រះល្អម៉ត់ម៉ង	ដឹកនាំខ្ញុំផងដាក់ផ្លូវល្អ	។
^១១-	ឱព្រះម្ចាស់អើយសូមគាំពារ	យល់ដល់នាមាព្រះបវរ
	ប្រទានជីវិតខ្ញុំកំដរ	ឲ្យបានរស់តទៅទៀតផង	។
	សូមជួយនាំខ្ញុំឲ្យចេញផុត	ពីភាពងងឹតអាប់មួរហ្មង
	គ្រោះថ្នាក់តូចធំអាសន្នផង	ដោយហឫទ័យទ្រង់សុចរិត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ៖ ខ្ញុំឈឺចុកចាប់ក្នុងឱរា ចិត្តខ្ញុំប្រេះ‌ឆាពន់ប្រមាណ។

បទលើកតម្កើងតាមភីលីព (ភីល ២,៦-១១)

បន្ទរទី៣៖ កាលព្រះ‌យេស៊ូសោយទឹកខ្មេះហើយ ព្រះ‌អង្គមានព្រះ‌បន្ទូលថា៖ «ខ្ញុំបានសម្រេចសព្វគ្រប់អស់ហើយ!» ។ ព្រះ‌អង្គក៏ឱនព្រះ‌សិរសាចុះ ហើយប្រគល់វិញ្ញាណទៅ។

^៦	ទោះ‌បីព្រះ‌អង្គមានឋានៈជាព្រះ‌ជាម្ចាស់ក៏ដោយ ក៏ព្រះ‌អង្គពុំបានក្ដោប‌ក្តាប់ឋានៈដែលស្មើនឹងព្រះ‌ជាម្ចាស់នេះ ទុកជាកម្ម‌សិទ្ធិដាច់មុខរបស់ព្រះ‌អង្គឡើយ។
^៧	ផ្ទុយទៅវិញ ព្រះ‌អង្គបានលះ‌បង់អ្វីៗទាំងអស់មកយកឋានៈជាទាសករ ព្រះ‌អង្គបានទៅជាមនុស្សដូចមនុស្សឯទៀតៗ ហើយក៏រស់នៅក្នុងភាពជាមនុស្សសាមញ្ញដែរ។
^៨	ព្រះ‌អង្គបានដាក់ខ្លួន ធ្វើតាមព្រះ‌បញ្ជារហូតដល់សោយទិវង្គត គឺរហូតដល់សោយទិវង្គតលើឈើឆ្កាងថែមទៀតផង។
^៩	ហេតុនេះហើយបានជាព្រះ‌ជាម្ចាស់លើកតម្កើងព្រះ‌អង្គឡើងយ៉ាងខ្ពង់‌ខ្ពស់បំផុត ព្រមទាំងប្រោសប្រទានឲ្យព្រះ‌អង្គមានព្រះ‌នាមប្រសើរលើសអ្វីៗទាំងអស់
^១០	ដើម្បីឲ្យអ្វីៗទាំងអស់ ទាំងនៅស្ថានបរម‌សុខ ទាំងនៅលើផែន‌ដី ទាំងនៅក្រោមដី នាំគ្នាក្រាបថ្វាយ‌បង្គំ នៅពេលណាឮព្រះ‌នាមព្រះ‌យេស៊ូ
^១១	និងឲ្យមនុស្សគ្រប់ភាសាប្រកាសឡើងថា ព្រះ‌យេស៊ូ‌គ្រីស្តជាព្រះ‌អម្ចាស់ ដើម្បីលើកតម្កើងសិរី‌រុងរឿងព្រះ‌ជាម្ចាស់ជាព្រះ‌បិតា។

បន្ទរ៖ កាលព្រះ‌យេស៊ូសោយទឹកខ្មេះហើយ ព្រះ‌អង្គមានព្រះ‌បន្ទូលថា៖ «ខ្ញុំបានសម្រេចសព្វគ្រប់អស់ហើយ!» ។ ព្រះ‌អង្គក៏ឱនព្រះ‌សិរសាចុះ ហើយប្រគល់វិញ្ញាណទៅ។

ព្រះបន្ទូលរបស់ព្រះជាម្ចាស់ (១សល ២,២១-២៤)

ព្រះអង្គត្រាស់ហៅបងប្អូនមកឲ្យរងទុក្ខលំបាកយ៉ាងនេះ ព្រោះព្រះ‌គ្រីស្តក៏បានរង‌ទុក្ខលំបាកសម្រាប់បង‌ប្អូន ទុកជាគំរូឲ្យបង‌ប្អូនដើរតាមគន្លងរបស់ព្រះ‌អង្គដែរ។ ព្រះ‌អង្គពុំដែលបានប្រព្រឹត្តអំពើបាបសោះហើយក៏ពុំដែលមានព្រះ‌បន្ទូលវៀចវេរណាចេញពីព្រះ‌ឱស្ឋរបស់ព្រះ‌អង្គឡើយ។ ទោះបីគេជេរប្រមាថព្រះ‌អង្គ ក៏ព្រះ‌អង្គមិនតបតទៅគេវិញដែរព្រះ‌អង្គបានរង‌ទុក្ខលំបាក តែព្រះ‌អង្គពុំបានគំរាមកំហែងគេវិញទេ ព្រះ‌អង្គផ្ញើជីវិតទៅលើព្រះ‌ជាម្ចាស់ដែលព្រះ‌អង្គវិនិច្ឆ័យដោយយុត្តិធម៌។ ព្រះ‌គ្រីស្តបានផ្ទុកបាបរបស់យើងក្នុងព្រះ‌កាយរបស់ព្រះ‌អង្គ ដែលជាប់លើឈើឆ្កាង ដើម្បីឲ្យយើងលែងជំពាក់‌ជំពិននឹងបាបតទៅមុខទៀត ហើយឲ្យយើងមានជីវិត ដោយប្រព្រឹត្តតែអំពើសុចរិត។ បង‌ប្អូនបានជាសះ‌ស្បើយ ដោយ‌សារស្នាមរបួសរបស់ព្រះ‌អង្គ។

បន្ទរ៖ ព្រះ‌អង្គបានដាក់ខ្លួន ធ្វើតាមព្រះ‌បញ្ជារហូតដល់សោយទិវង្គត គឺរហូតដល់សោយទិវង្គតលើឈើឆ្កាងថែមទៀតផង។

ទំនុកតម្កើងរបស់ព្រះនាងម៉ារី

បន្ទរ៖ ព្រះ‌ជាម្ចាស់សម្រុះ‌សម្រួលយើងឲ្យជានានឹងព្រះ‌អង្គវិញ ដោយព្រះ‌បុត្រារបស់ព្រះ‌អង្គសោយទិវង្គត ក្នុងគ្រាដែលយើងនៅជាសត្រូវនឹងព្រះ‌អង្គនៅឡើយ។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ ព្រះ‌ជាម្ចាស់សម្រុះ‌សម្រួលយើងឲ្យជានានឹងព្រះ‌អង្គវិញ ដោយព្រះ‌បុត្រារបស់ព្រះ‌អង្គសោយទិវង្គត ក្នុងគ្រាដែលយើងនៅជាសត្រូវនឹងព្រះ‌អង្គនៅឡើយ។

ពាក្យអង្វរសកល

នៅថ្ងៃនេះ យើងខ្ញុំចងចាំពីការសោយទិវង្គតរបស់ព្រះអម្ចាស់យេស៊ូគ្រីស្ត ដែលនាំឱ្យពិភពលោកទាំងមូលកើតជាថ្មី។ ចូរយើងវិលទៅរកព្រះជាម្ចាស់ជាព្រះបិតា ហើយទូលអង្វរព្រះអង្គថា៖

បន្ទរ៖ ឱព្រះអម្ចាស់អើយ ! ដោយយល់ដល់ព្រះបុត្រាសោយទិវង្គត សូមព្រះអង្គសណ្តាប់ពាក្យអង្វររបស់យើងខ្ញុំផង !

-សូមព្រះអង្គបង្រួបបង្រួមព្រះសហគមន៍ឱ្យទៅជាធ្លុងតែមួយ -បន្ទរ…

-សូមព្រះអង្គថែរក្សាសម្តេចប៉ាបព្រះនាម (…) -បន្ទរ…

-សូមព្រះអង្គប្រោសឱ្យប្រជារាស្រ្តរបស់ព្រះអង្គបានវិសុទ្ធ ទាំងបព្វជិត និងគ្រីស្តបរិស័ទគ្រហស្ត ដោយសារព្រះវិញ្ញាណដ៏វិសុទ្ធ -បន្ទរ…

-សូមព្រះអង្គពង្រឹងជំនឿ និងការយល់ដឹងដល់អស់អ្នកដែលស្ថិតនៅក្រោមការណែនាំ -បន្ទរ…

-សូមព្រះអង្គប្រមូលគ្រីស្តបរិស័ទទាំងអស់ ឱ្យចេះរួបរួមគ្នា -បន្ទរ…

-សូមព្រះអង្គណែនាំប្រជាជនជាតិយូដា ឱ្យទៅកាន់ការសង្រ្គោះយ៉ាងពេញលេញផង -បន្ទរ…

-សូមព្រះអង្គបង្ហាញសិរីរុងរឿងបំភ្លឺដល់អស់អ្នកដែលមិនទាន់ជឿលើព្រះគ្រីស្ត -បន្ទរ…

-សូមព្រះអង្គណែនាំចិត្តគំនិតមេដឹកនាំយើងខ្ញុំ -បន្ទរ…

-សូមព្រះអង្គលួងលោមចិត្តអ្នកដែលមានទុក្ខព្រួយ -បន្ទរ…

-សូមព្រះអង្គអាណិតអាសូរអស់អ្នកដែលបានទទួលមរណភាព -បន្ទរ…

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាដែលស្រឡាញ់មនុស្សលោកហួសពន់ប្រមាណ ! ព្រះអង្គសព្វព្រះហឫទ័យឲ្យព្រះបុត្រាព្រះអង្គសោយទិវង្គត ដើម្បីរំដោះមនុស្សលោកឲ្យរួចពីបាប។ សូមព្រះអង្គបំភ្លឺយើងខ្ញុំឲ្យដើរជាមួយព្រះគ្រីស្ត ដែលរងទុក្ខលំបាកលីឈើឆ្កាង ហើយប្រោសយើងខ្ញុំឲ្យបានវិសុទ្ធ ស្របតាមគម្រោងការដ៏អស្ចារ្យនៃបុណ្យចម្លងនេះ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

10 Views

Post Views: 10