ថ្ងៃទី១ មករា (ពេលល្ងាចទី១)

Posted on 31 ខែធ្នូ 202427 ខែធ្នូ 2024 by Siya Khim

សប្តាហ៍ព្រះយេស៊ូប្រសូត

ព្រះនាងម៉ារី ជាមាតាព្រះជាម្ចាស់

(បុណ្យឱឡារិក)

(ពេលល្ងាចទី១)

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

បទចម្រៀងចូល

ទំនុកតម្កើងលេខ ១១៣

បន្ទរទី១៖ “ឱការប្តូរដ៏អស្ចារ្យ ! ព្រះជាម្ចាស់ជាព្រះបង្កើតមនុស្សលោកបានទទួលយករូបកាយ និងព្រលឹង ព្រះអង្គសព្វព្រះហឫទ័យប្រសូតពីព្រហ្មចារិនីម្នាក់។ យើងខ្ញុំបានទទួលមត៌ករួមជាមួយព្រះគ្រីស្ត ដោយសារព្រះអង្គបានបន្ទាបខ្លួន ចូលមកក្នុងសភាពជាមនុស្សដូចយើងខ្ញុំ” ។

^១	ចូរសរសើរតម្កើងព្រះអម្ចាស់! អ្នកបម្រើរបស់ព្រះ‌អម្ចាស់អើយ ចូរនាំគ្នាសរសើរតម្កើងព្រះអង្គ! ចូរនាំគ្នាសរសើរតម្កើងព្រះ‌នាមព្រះ‌អម្ចាស់!
^២	ចូរលើកតម្កើងព្រះ‌នាមព្រះ‌អម្ចាស់តាំងពីពេលនេះរហូតតទៅ!
^៣	តាំងពីពេលថ្ងៃរះ រហូតទល់ថ្ងៃលិច ចូរសរសើរតម្កើងព្រះ‌នាមរបស់ព្រះ‌អម្ចាស់!
^៤	ព្រះ‌អម្ចាស់គង់នៅពីលើប្រជា‌ជាតិទាំង‌ឡាយ សិរី‌រុងរឿងរបស់ព្រះ‌អង្គខ្ពស់ជាងផ្ទៃមេឃទៅទៀត។
^៥	តើមាននរណាអាចផ្ទឹមស្មើនឹងព្រះអម្ចាស់ជាព្រះរបស់យើងបាន? ព្រះ‌អង្គគង់នៅលើស្ថានដ៏ខ្ពស់បំផុត
^៦	ព្រះ‌អង្គទតមើលមកផ្ទៃមេឃ និងផែន‌ដី ដែលនៅខាងក្រោមព្រះ‌អង្គ។
^៧	ព្រះ‌អង្គលើកមនុស្សទន់ខ្សោយឡើងពីធូលីដី ព្រះ‌អង្គលើកមនុស្សទុរគតឡើងពីភក់ជ្រាំ
^៨	ដើម្បីឲ្យគេកាន់កាប់អំណាចរួមជាមួយពួកអ្នកធំ គឺរួមជាមួយពួកអ្នកធំនៅក្នុងចំណោមប្រជា‌រាស្ដ្ររបស់ព្រះ‌អង្គ។
^៩	ព្រះ‌អង្គប្រទានឲ្យស្ត្រីអារមានកូន ឲ្យនាងរស់នៅក្នុងផ្ទះយ៉ាងសប្បាយ ជាមួយកូនៗរបស់នាង។ អាលេលូយ៉ា!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ “ឱការប្តូរដ៏អស្ចារ្យ ! ព្រះជាម្ចាស់ជាព្រះបង្កើតមនុស្សលោកបានទទួលយករូបកាយ និងព្រលឹង ព្រះអង្គសព្វព្រះហឫទ័យប្រសូតពីព្រហ្មចារិនីម្នាក់។ យើងខ្ញុំបានទទួលមត៌ករួមជាមួយព្រះគ្រីស្ត ដោយសារព្រះអង្គបានបន្ទាបខ្លួន ចូលមកក្នុងសភាពជាមនុស្សដូចយើងខ្ញុំ” ។

ទំនុកតម្កើងលេខ ១៤៧,១២-២០

បន្ទរទី២៖ ដោយព្រះអង្គបានចាប់កំណើតពីនាងព្រហ្មចារិនី ព្រះអង្គបានបំពេញតាមសេចក្តីដែលមានចែងទុកក្នុងព្រះគម្ពីរ៖ ឱព្រះជាម្ចាស់អើយ! យើងខ្ញុំសូមកោតសរសើរព្រះអង្គ! ដ្បិតព្រះអង្គបានយាងចុះមកសង្រ្គោះប្រជារាស្រ្តរបស់ព្រះអង្គ ដូចដំណក់ទឹកភ្លៀងដែលធ្លាក់ចុះមកលើផែនដី។

(បទព្រហ្មគីតិ)

^១២-	ក្រុងយេរូសាឡឹម	កុំស្ងាត់ស្ងៀមនៅរេរង់
	ព្រមទាំងក្រុងស៊ីយ៉ូន	ចូរត្រៀមខ្លួនថ្កើងព្រះម្ចាស់	។
^១៣-	ដ្បិតព្រះអង្គការពារ	អ្នករាល់គ្នាបានសុខណាស់
	ទ្រង់ឲ្យពរដល់រាស្រ្ត	ដែលរស់ពាសពេញទីក្រុង	។
^១៤-	ទ្រង់ប្រទានទឹកដី	មានសេរីសុខត្រចង់
	សន្តិភាពគ្រប់ជ្រុង	ស្រូវបម្រុងច្រើនមហិមា	។
^១៥-	នៅលើផ្ទៃផែនដី	ស្រស់ប្រិមប្រីយ៍ទ្រង់បញ្ជា
	ផ្សព្វផ្សាយគ្រប់ទិសា	ពីបញ្ជាព្រះអម្ចាស់	។
^១៦-	ព្រះអង្គឲ្យទឹកកក	ធ្លាក់ចុះមកច្រើនដេរដាស
	សន្សើមត្រជាក់ណាស់	ក៏ធ្លាក់ចុះតាមបញ្ជា	។
^១៧-	ព្រះអង្គធ្វើឲ្យព្រឹល	ធ្លាក់មិនខ្ជិលច្រើនមហិមា
	ឲ្យមានធាតុរងា	តើនរណាអាចទ្រាំបាន?	។
^១៨-	ពេលទ្រង់មានបន្ទូល	ធ្វើឲ្យព្រឹលទាំងប៉ុន្មាន
	ទឹកកកគ្រប់ទីស្ថាន	រលាយបានជាទឹកអស់	។
	ធ្វើឲ្យមានទាំងខ្យល់	បោកវិលវល់មិនឈប់សោះ
	បក់យកទឹកទាំងនោះ	ហូរតាមជ្រោះទៅមិនសល់	។
^១៩-	ទ្រង់សម្តែងឲ្យពូជ	លោកយ៉ាកុបស្តាប់បន្ទូល
	ក្រឹត្យវិន័យនិមល	ឲ្យអ៊ីស្រាអែលបានដឹង	។
^២០-	ព្រះអង្គពុំបញ្ជា	សព្វកិច្ចការអស់ទាំងហ្នឹង
	ឲ្យជាតិសាសន៍ផ្សេងដឹង	វិន័យទ្រង់នោះសោះឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ដោយព្រះអង្គបានចាប់កំណើតពីនាងព្រហ្មចារិនី ព្រះអង្គបានបំពេញតាមសេចក្តីដែលមានចែងទុកក្នុងព្រះគម្ពីរ៖ ឱព្រះជាម្ចាស់អើយ! យើងខ្ញុំសូមកោតសរសើរព្រះអង្គ! ដ្បិតព្រះអង្គបានយាងចុះមកសង្រ្គោះប្រជារាស្រ្តរបស់ព្រះអង្គ ដូចដំណក់ទឹកភ្លៀងដែលធ្លាក់ចុះមកលើផែនដី។

បទលើកតម្កើងតាមលិខិតអេភេសូ ១,៣-១០

បន្ទរទី៣៖ ឱព្រះមាតារបស់ព្រះជាម្ចាស់អើយ ! ព្រះនាងជាស្រ្តីដែលមានពរ ហើយផលដែលកើតចេញពីផ្ទៃព្រហ្មចារីរបស់ព្រះនាង ប្រៀបដូចជាអណ្តាតភ្លើងដែលឆេះនៅកណ្ដាលគុម្ពោត តែគុម្ពោតមិនឆេះទេ ឱ្យលោកម៉ូសេបានឃើញនៅលើភ្នំស៊ីណៃ។ សូមព្រះនាងជួយអង្វរព្រះជាម្ចាស់ឱ្យយើងខ្ញុំផង។

^៣	សូមលើកតម្កើងព្រះ‌ជាម្ចាស់ ជាព្រះ‌បិតារបស់ព្រះ‌យេស៊ូ‌គ្រីស្ត ជាព្រះ‌អម្ចាស់នៃយើង ដែលបានប្រោសប្រទានព្រះ‌ពរគ្រប់យ៉ាងផ្នែកខាងវិញ្ញាណពីស្ថានបរម‌សុខមកយើង ក្នុងអង្គព្រះ‌គ្រីស្ត។
^៤	ព្រះ‌អង្គបានជ្រើស‌រើសយើងក្នុងអង្គព្រះ‌គ្រីស្ត តាំងពីមុនកំណើតពិភព‌លោកមកម៉្លេះ ដើម្បីឲ្យយើងវិសុទ្ធ និងឥតសៅ‌ហ្មងនៅចំពោះព្រះ‌ភក្ត្រព្រះ‌អង្គ ព្រោះព្រះ‌អង្គមានព្រះ‌ហឫទ័យស្រឡាញ់យើង។
^៥	ព្រះ‌អង្គបានតម្រូវយើងទុកជាមុន ឲ្យធ្វើជាបុត្រធីតារបស់ព្រះ‌អង្គ ដោយ‌សារព្រះ‌យេស៊ូ‌គ្រីស្ត ស្របនឹងបំណងដ៏សប្បុរសរបស់ព្រះ‌អង្គ
^៦	ដើម្បីឲ្យយើងលើកតម្កើងសិរី‌រុងរឿងនៃព្រះ‌ហឫទ័យប្រណី‌សន្ដោស ដែលព្រះ‌អង្គបានប្រោសប្រទានមកយើង ក្នុងអង្គព្រះ‌បុត្រាដ៏ជាទីស្រឡាញ់របស់ព្រះ‌អង្គ។
^៧	ដោយយើងរួមក្នុងអង្គព្រះ‌គ្រីស្តនេះ ព្រះ‌ជាម្ចាស់បានលោះយើង ដោយព្រះ‌លោហិតរបស់ព្រះ‌អង្គ និងលើក‌លែងទោសឲ្យយើងបានរួចពីបាប តាមព្រះ‌ហឫទ័យប្រណី‌សន្ដោសដ៏លើស‌លប់របស់ព្រះ‌អង្គ។
^៨	ព្រះ‌ជាម្ចាស់ប្រណី‌សន្ដោសយើងយ៉ាងខ្លាំងបំផុត គឺព្រះ‌អង្គប្រទានឲ្យយើងមានតម្រិះ និងប្រាជ្ញាដ៏វាង‌វៃគ្រប់យ៉ាង។
^៩	ព្រះអង្គបានប្រោសឲ្យយើងស្គាល់គម្រោងការដ៏លាក់កំបាំងនៃព្រះ‌ហឫទ័យរបស់ព្រះ‌អង្គ តាមបំណងដ៏សប្បុរស ដែលព្រះ‌អង្គបានសម្រេចទុកជាមុនដោយព្រះ‌អង្គផ្ទាល់។
^១០	ព្រះអង្គចាត់ចែងគម្រោងការនេះឲ្យបានសម្រេច នៅគ្រាចុងក្រោយបំផុត គឺប្រមូលអ្វីៗទាំងអស់ដែលនៅស្ថានបរម‌សុខ និងនៅលើផែន‌ដី ឲ្យរួមគ្នានៅក្នុងអង្គព្រះ‌គ្រីស្ត ជាម្ចាស់តែមួយ។

បន្ទរ ៖ ឱព្រះមាតារបស់ព្រះជាម្ចាស់អើយ ! ព្រះនាងជាស្រ្តីដែលមានពរ ហើយផលដែលកើតចេញពីផ្ទៃព្រហ្មចារីរបស់ព្រះនាង ប្រៀបដូចជាអណ្តាតភ្លើងដែលឆេះនៅកណ្ដាលគុម្ពោត តែគុម្ពោតមិនឆេះទេ ឱ្យលោកម៉ូសេបានឃើញនៅលើភ្នំស៊ីណៃ។ សូមព្រះនាងជួយអង្វរព្រះជាម្ចាស់ឱ្យយើងខ្ញុំផង។

ព្រះបន្ទូលរបស់ព្រះជាម្ចាស់ (កាឡ ៤,៣-៧)

រីឯយើងវិញក៏ដូច្នោះដែរ កាលនៅក្មេងខ្ចីនៅឡើយ យើងធ្វើជាខ្ញុំបម្រើនៃអ្វីៗជាអរូប ដែលមានឥទ្ធិ‌ពលលើលោកីយ៍នេះ ប៉ុន្តែ លុះដល់ពេលកំណត់ហើយ ព្រះ‌ជាម្ចាស់ក៏ចាត់ព្រះ‌បុត្រារបស់ព្រះ‌អង្គឲ្យមកប្រសូតចេញពីស្ត្រី ហើយប្រសូតក្រោមអំណាចរបស់វិន័យផង ដើម្បីលោះអស់អ្នកដែលស្ថិតនៅក្រោមអំណាចវិន័យ និងឲ្យយើងទទួលឋានៈជាបុត្រធីតារបស់ព្រះ‌អង្គ។ បង‌ប្អូនពិតជាបុត្ររបស់ព្រះ‌ជាម្ចាស់មែន ព្រោះព្រះ‌អង្គបានចាត់ព្រះ‌វិញ្ញាណនៃព្រះ‌បុត្រារបស់ព្រះ‌អង្គ ឲ្យមកសណ្ឋិតក្នុងចិត្តយើង គឺព្រះ‌វិញ្ញាណនេះហើយ ដែលបន្លឺព្រះ‌សូរសៀងឡើងថា «អប្បា! ឱព្រះ‌បិតា!»។ ដូច្នេះ អ្នកមិនមែនជាខ្ញុំបម្រើទៀតទេ គឺអ្នកជាបុត្រ‌ធីតារបស់ព្រះ‌អង្គវិញ។ បើអ្នកជាបុត្រ‌ធីតាមែន អ្នកក៏ត្រូវទទួលមត៌កដែលព្រះ‌ជាម្ចាស់ប្រទានឲ្យនោះដែរ។

បន្ទរ៖ ព្រះបន្ទូលបានកើតមកជាមនុស្ស *អាលេលូយ៉ា! អាលេលូយ៉ា!។ បន្ទរឡើងវិញ៖…
—ហើយគង់នៅក្នុងចំណោមយើងរាល់គ្នា។ បន្ទរ៖ *…
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ ព្រះជាម្ចាស់ស្រឡាញ់មនុស្សលោកខ្លាំងណាស់ ព្រះអង្គបានប្រទានព្រះបុត្រារបស់ព្រះអង្គឲ្យយាងមក មានជាតិជាមនុស្សដូចមនុស្សឯទៀតៗ ដែលមានបាប ឲ្យមកប្រសូតចេញពីស្ត្រី ហើយប្រសូតក្រោមអំណាចរបស់វិន័យផង។ អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ព្រះជាម្ចាស់ស្រឡាញ់មនុស្សលោកខ្លាំងណាស់ ព្រះអង្គបានប្រទានព្រះបុត្រារបស់ព្រះអង្គឲ្យយាងមក មានជាតិជាមនុស្សដូចមនុស្សឯទៀតៗ ដែលមានបាប ឲ្យមកប្រសូតចេញពីស្ត្រី ហើយប្រសូតក្រោមអំណាចរបស់វិន័យផង។ អាលេលូយ៉ា!

ពាក្យអង្វរសកល

សូមលើកតម្កើងព្រះអម្ចាស់យេស៊ូ ដែលជាសេចក្តីសុខសាន្តនៃយើងខ្ញុំ។ ព្រះអង្គយាងមកបង្រួបបង្រួមមនុស្សលោកឱ្យជានានឹងព្រះជាម្ចាស់។
ចូរយើងទូលអង្វរព្រះអង្គ ដោយចិត្តរាបសារថា ៖

បន្ទរ៖ បពិត្រព្រះអម្ចាស់! សូមប្រទានសេចក្តីសុខសាន្តរបស់ព្រះអង្គមកយើងខ្ញុំ !

ពេលព្រះអង្គប្រសូត ទ្រង់បានបង្ហាញពីព្រះហឫទ័យសប្បុរស និងស្លូតបូត
—សូមជួយឱ្យយើងខ្ញុំចេះដឹងគុណព្រះអង្គជានិច្ច នូវព្រះពរទាំងប៉ុន្មានដែលយើងខ្ញុំបានទទួលនោះផង។ (បន្ទរ)

ព្រះអង្គយាងមក ដើម្បីប្រកាសដំណឹងល្អរបស់ព្រះជាម្ចាស់ដល់ពិភពលោក
—សូមឱ្យអ្នកប្រកាសព្រះបន្ទូល និងអ្នកស្តាប់ មានចំនួនកើនឡើងផង។ (បន្ទរ)

ព្រះអង្គសព្វព្រះហឫទ័យក្លាយទៅជាបងប្អូនរបស់យើងខ្ញុំ ដោយប្រសូតពីព្រះនាងព្រហ្មចារិនីម៉ារី
—សូមព្រះអង្គបង្រៀនបុរស និងស្រ្តី ឱ្យចេះស្រឡាញ់គ្នាទៅវិញទៅមក ទុកដូចជាបងប្អូនបង្កើត។ (បន្ទរ)

ព្រះអង្គយាងមកប្រៀបបីដូចជាព្រះអាទិត្យរះឡើងបំភ្លឺភពផែនដី
—សូមព្រះអង្គបង្ហាញពន្លឺនៃព្រះភក្ត្រព្រះអង្គដល់អស់អ្នក ដែលបានទទួលមរណភាពផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាជាអម្ចាស់ ! ព្រះអង្គប្រោសឲ្យព្រះនាងព្រហ្មចារិនីម៉ារី បង្កើតព្រះបុត្រាព្រះអង្គដើម្បីសង្គ្រោះមនុស្សលោក។ តាមរយៈពាក្យទូលអង្វររបស់ព្រះនាង សូមព្រះអង្គមេត្តាប្រោសឲ្យយើងខ្ញុំសមនឹងទទួលព្រះអម្ចាស់យេស៊ូគ្រីស្ត ជាព្រះបុត្រា ដែលជាប្រភពនៃជីវិតថ្មី។

យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

79 Views

Post Views: 81